Gullskórinn út í glugga og maddaman óskar sér nærklæða í skóinn. Maddaman var nefnilega að kaffihúsast og var að spássera eftir kaffinu og finnst tveir voða myndarlegir strákar vera að horfa mikið á hana. Maddaman reiknaði að sjálfsögðu með að þeir væru alvegaðfarahleypaísigkjark til að spyrja hvort hún vildi giftast þeim báðum..en nei nei þegar að borðinu kom spurði meðreiðarsveinn maddömunnar hvað stæði upp úr bolnum hjá henni...var það ekki helvítis spöngin á brjóstahaldinu að gefa sig og nú er fátt um fína drætti að verða. Spurning um að leita til kommúnunar með styrki;O)

Jólahassið....

Maddaman fór með stöllu sinni á jólamarkaðinn í Kristjaníu áðan. Þar voru menn að testa jólahassið í gúddí fíling. Ekki ágirntust þó maddaman&stallan nokkurn skapaðan hlut þar og var þetta því ódýr ferð. Hér hjá maddömunni er annars allt á heljar þröm eins og vant er á þessum árstíma. Ekkert gengur með jólabréfið og maddaman endar örugglega bara á því að skrif gúdbæ og lóvjú aftan á frímerkið.
Svo er kommentakerfið týnt og maddaman fílar sig eins og Palli kallinn þegar hann var einn í heiminum!!! Til að bæta gráu ofan á svart braut maddaman eitt af bláu vatnsglösunum áðan. Maddaman er búin að brjóta um 30 vatnsglös síðan hún hún hóf búskap fyrir um 8 árum síðan. Í Sumarhúsum hafa verið til 9 glær óbrjótandi vatnsglös síðan maddaman man eftir sér og svo 3 brún kaffiglös. Eitt glas týndist þegar Sumarhúsabóndinn hélt garðpartý í tilefni hálfrar aldrar afmæli sínu en fannst í blómapotti síðarmeir.
Eina sem að getur glatt maddömuna núna er Aðventulag Baggalúts, um hann Sússa http://www.baggalutur.is/mp3/Baggalutur_Sagan_af_Jesusi.mp3
og textinn hér
SAGAN AF JESÚSI

Það var um þetta leyti þarna suðurfrá
- í miðausturlöndum.
Þar var ungt par á ferlikonan kasólétt
- þeim var vandi á höndum.

Öll mótelin vor'upptekin
og yfirbókuð gistiheimilin.

Og þannig byrjaði sagan af því
þegar hann Jesús kom heiminn í.


Þau létu fyrirberast inní fjárhúsi
- með ösnum og kindum.
En það var ósköp kósí ekki ósvipað
– gömlum biblíumyndum.

Þar kom í heiminn – mannkyns von
hinn kunni Jesús Kr. Jósepsson.
Hann endaði í jötunni
beint undir Betlehemstjörnunni.

Og þannig hljómar nú sagan af því þegar hann Jesús kom heiminn í.

Hallelúja!
Og þannig hljómar nú sagan af því þegar hann Jesús kom heiminn í.

Svo ráku inn nefið vitringar
sem fyrir rælni voru staddir þar.
Þeir óðu inn með gras og gull
og eitthvað óríental jurtasull.

Ó, Jósep sendi SMS.
Ó, María, var bara furðu hress.
Ó, barnið lá og snuðið saug með bros á vör
– og soldinn geislabaug

Og þannig endar nú sagan af því þegar hann Jesús kom heiminn í.
Já, þannig hljómaði sagan af því þegar hann Sússi kom heiminn í.
Þið ráðið sjálf hvort þið trúið því
Amen

Is that the right girl....

Maddaman er nýkomin úr ondúleringu á Nörrebro hjá hárgreiðslukonunni sem að hún kynntist á þessu ári. Hún er ósköp notaleg stúlka og alltaf gaman að finna hana aukinheldur sem að hún er afskaplega flínk hárgreiðslukona. Dæmigerður duglegur íslendingur, hún er til dæmis sú eina sem að gerir brúðargreiðslur á stofunni. Aðrir treysta sér ekki í það og kunna/nenna ekki.
Maddaman ætlar í meiri ondúleringu í næstu viku hjá annari óndúleríngarkonu og svo fann hún út að það er hægt að láta að líma á sig augnhár til frambúðar, nokkrar mismunandi lengdir í boði.
Svo er mjög inn að láta festa á sig aukahár, svo er hægt að kaupa sér x-mikið sílikon og pota þar sem við á og svo er náttlega alskyns extreme makeover í boði!!! Maddaman ætlar þó ekki að nýta sér alla þessa þjónustu núna en gott að vita af henni ekki satt?

Kuldaboli

Maddaman er búin að ákveða að setja gullskóinn út í glugga þegar það má (þennan með manndrápspinnahælunum). Hvað óskar maddaman sér að fá í skóinn?? Jútakk fullskapaðan karlmann án fylgihluta( lesist sem mikið af börnum, kettir og hundar: Rollur og hross hinsvegar velkomið) gjarnan yfir 1,80 á hæð en þó ekki krafa;o)
Og hvað á svo að nota hann spyrja menn sig? Það er góð spurning þar sem maddaman kann að bora, skrúfa, opna hurðir sem ekki er hægt að opna með lyklinum (athuga samt ekki innbrot), lesa úr flóknum rafmagnstöflum, skipta um kló og tengja ljós, græja tölvuna( okei nýtur oft aðstoðar tæknimanns þar) og er yfir höfuð mjög sjálfbjarga í lífinu!!!
Jú sæng maddömunnar ættuð frá Lars Larsen er orðin þunn og það er kalt í ríki drottningar núna.
Kannski borgar sig bara að kaupa nýja sæng?????

PS. Austur á landi var nebbilega maður sem að fékk konu í skóinn...frá vini sínum sem hafði ekki not fyrir hana þegar á hólminn var komið.....það var allavega orðið svoleiðis þegar kom fram á þorrann og farið var að yrkja þorrablótsbragina.

Lúllubía......

Maddaman sá í fréttunum að það ku vera gott fyrir vinnuafköstin að sofa fram eftir á morgnana. Það er nú gott að maddaman praktíserar það um þessar mundir og er svo eins og ugla á kvöldin í staðinn. En það skiptir engu máli ef afköst sólarhringsins eru þau sem til er ætlast. Um daginn sá maddaman líka að það væri meinhollt að leggja sig eftir hádegið. Þetta gerðu gömlu bændurnir alltaf og varð gott af. Sumarhúsabóndanum þykir þetta ósköp gott, og Bjartur í Sumarhúsum lagði sig aldrei nema í 3 mínútur og þá velti hann sér ofan í poll því að það var svo hressandi að vakna svoleiðis!!
Maddaman veit bara að henni finnst gott að leggja sig á daginn sérstaklega þegar hún er að reyna troða miklu góðmeti inn í hausinn á sér í einu, bara ekki of lengi í einu!! Eins finnst henni gott að sofa þegar er myrkur á morgnana...en er að sama skapi afskaplega morgunhress þegar bjart er á morgana. Nú er spurning hvort að hinir nýju launagreiðendur maddömunnar muni samþykkja að í samningnum standi; Mætir þegar birtir, tekur laaaangan lunch til að leggja sig en er vel upplögð til að sinna skjólstæðingum sínum milli 22:00 og 2:00 á kvöldin/nóttunni!!!!

Spádómskertið......

Maddaman er búin að jólaföndra eitt stykki krans a la selja. Alltaf á hverju ári eru uppi róttækar hugmyndir um að gera eitthvað villt öðruvísi þetta árið en endar alltaf í að vera dálítið mikinn vafinn hringur með ýmsum tegundum af grasmeti, eplum og rauðum borða með gyllingu.
Ósköp venjubundið en maddömunni finnst hann fínn. Svo setti maddaman upp Georg Jensen skrípin sín tvö ( maddaman er dálítð svag fyrir þeirri ætt) sem er eiginlega eina jólaskrautið í Kardimommubænum enda býður Kardimommubærinn ekki upp á mikla þemavinnu með jólin!!!
Þá er bara eftir útgáfa á hinu árlega jólabréfi sem að maddömunni finnst vera orðið þreytt konsept en sumum áskrifendum finnst þetta hins vegar vera hápunktur jólanna (og þá helst fólk sem að aldrei hefur séð maddömmuna)
En meðan engin eru berössuð börnin til að bregða á gæruskinnið og maddaman sjálf treystir sér ekki til að láta mynda sig á sama skinni þá er þetta meðalvegurinn.
Hins vegar ræddi maddaman um þetta jólgjafafár við vinkonu í gær og var hún sammála að þetta væri bara algert rugl. Það vantar engan neitt. Hins vegar er maddaman eins og Björk Guðmundsdóttir sem að sagði einu sinni í viðtali að hún keypti sér alltaf allt fyrir jólin sem að hana langaði í!!!

Hérna megin eða hinu megin

Færeyingarnir eru að svæla maddömunna út út greninu með ýldulykt, hún stafar af einhverjum ónýtum matvælum svosem rastakjöti eða bara signum fiski sem að þeir láta transport hingað. Þetta er álíka lífseig fýla og af skötuskrattanum. Maddaman lýsti yfir hljóðlátu stríði og fór og opnaði brunahurðina sem er stránglega bannað!
En að öðru, maddaman var að lesa dánartilkynningar eins og hún gerir alltaf til að sjá hvort menn lifa eða deyja. Þá rifjaðist upp fyrir henni þegar hún í fljótfærni jarðaði jóska kennarann, en þá var maddaman í valkúrsum við háskólann þar sem hún var í tímum með Rikke nokkuri sem að maddaman var í litlum kynnum við en úr gamla hóp maddömunnar var önnur Rikke sem að maddaman þekkti meira. Allt í einu kemur tölvupóstur sem að segir frá andláti föður Rikke og maddaman telur það vera Rikke sem að hún þekkti meira vegna ýmissa atriða sem að pössuðu vel. Að sjálfsögðu miðlaði maddaman þessum fréttum til skólafélagann og samúðarbréfum og kveðjum rigndi yfir Rikke sem að varð algerlega hvumsa og vissi ekki annað en að faðir hennar Jótinn væri keikur við kennslu sem og hann var. Maddaman var dálítið stúrin yfir þessu rugli og Jótinn var leiður fyrir hönd maddömunnar en bað fyrir kveðjur og sagðist vera ótrúlega hress!!
Síðar tók maddaman líka hendina af konu einni austur á Egilsstöðum en var snögg að setja hana á aftur þegar viðmælandinn maldaði í móinn og sagðist hafa séð hina sömu hendi viðra dulur á snúru löngu eftir að maddaman aflimaði viðkomandi!!!
Þetta stafaði af nafnaruglingi! Þar með leystist það mál......og kennir maddömunni og öðrum að fara varlega í fréttaflutningi og fólki að gá að sér hvað það lætur frá sér á netið og sendir um í tölvupóstum til ókunnugra.
Góðar stundir

Þánkar.....

Maddaman hefur mikið verið að kynna sér löggjöf í kringum fatlaða og þurfamenn (nútíma kúnnar félagsmálastofnunnar). Ef að nútímafólk væri betur að sér um það hversu réttlaus og vonlaus lífsbarátta þessa fólks var fram á 20. öldina, þá held ég að fólk myndi hugsa sig tvisvar um áður en það kvartar undan aðbúnaðinum í dag. Til dæmis voru þurfamenn ekki með kosningarétt né fjárræði fyrr en 1936. Hreppaflutningarnir frægu hafa nú verið í gildi fram á þennan dag nánast. Þegar Kópavogshæli var leyst upp voru vistmenn þess fluttir hreppaflutningum heim til fæðingarstaðanna. Maddaman er þó ekki að segja að það sé ákjósanlegt að vera öryrki eða þurfa að þiggja aðstoða félagsmálastofnunnar en það hefur margt breyst til batnaðar á ekki ýkja mörgum áratugum.
Sem betur fer, það á alltaf að verða framþróun ef að hún er til góðs.

Happy birthday mister president......

Maddaman á eins árs bloggafmæli um þessar mundir. Rósir og kampavín vel þegnar, afþví að freyðivíninu var stútað um síðustu helgi enda tilefni til;O)

Af fjölnota pottum... og baslaranum

Maddaman var að horfa á íslenska "baslarann" eins og gárungarnir nefna hann. Nú er maddaman vel kunnug piltinum og hefur ef til vill spillt mörgum árum meðan tækifærin voru góð. Maddömunni finnst vegur hans og virðing hafa aukist í þáttunum og þó sérstaklega núna í þessum síðasta þætti (maddaman hefur ekki séð þetta alveg allt samt vegna ónógra skilyrða eins og það hét í gamla daga)
En maddaman skilur ekkert í því að baslarinn skyldi gefa puntuðu síðkjóladömunum MultiPott sem að hlýtur að vera einhver mjög fjölhæfur pottur!
Það er ábyggilegt að maddaman hefði rotað baslarann og hvurn þann sem að dirfst hefði að gefa henni potta&pönnur í tækifærisgjöf eða jólagjöf. Maddaman hefur móttekið salt&piparsett og hnífasett frá karlmönnum, sitthvorum þó og eru dagar þeirra taldir (í lífi maddömunnar allavega) og reiknar hún ekki með að hitta þá hvorki í þesu lífi né seinna lífi.
Semsagt leiðin að hjarta maddömunnar næstu 60 jólin eða svo eru ekki eldhúsáhöld og ef að einhverjum dettur til hugar að baðvogir séu sniðug gjöf, þá verður hnífasettahöfðinginn að eiga það litla sem hann á, en hann hafði vit á að velja gott merki sem að bítur vel!!!!

Pest og Kolera

Maddömunni finnst með ólíkindum að íslendingar skyldu ekki deyja út á sínum tíma! Ef að ekki gekk á með Stóru-Bólu, Móðuharðindum eða spænsku veikinni, þá hlupu menn á inniskóm (sauðskinnskóm) út um allar heiðar og fengu lungabólgu eða drukknuðu í ám og vötnum á leiðinni. Innantökur (krabbamein nútímans), berklar og barnsfarir að maður tali nú ekki um barnadauðann allan og svona mætti lengi telja. Héraðslæknarnir óperuðu á hurðum og strigapokum og ekkert var um annað að ræða. Nútíminn er hins vegar ofalinn með bakflæði og vefjagigt og hefur allt of góðan tíma til að útspekúlera hvar honum er illt!!!

Det var en lørdag aften......

Maddaman er búin að vera að hræra í Páli og félögum stanslaust núna alla helgina. Það stefnir allt í að gráu hárunum fjölgi all hraustlega við þetta verkefni. Maddaman var að umskrifa 1 kaflann og við það styttist hann svona hryllilega og margar hörmungar brustu á. En hvað sem tautar og raular fer fyrsti kaflinn til rannsóknar hjá jólasveininum um næstu helgi!! Í kvöld ætlar maddaman að rannsaka allt aðrar slóðir!
Maddaman er með frábæra hugmynd að jólagjöfum til nágranna sinna. Árs áskrift af Durex með ásettningarkennslu;O) Þá ætti maddaman að vera hólpin það árið!

Næturbrölt með prestum...

Maddaman eyddi fyrri part næturinnar með þremur karlmönnum. Séra Páli Pálssyni, Séra Gísla og Brandi sem var ekki séra. Sérstaklega er fyrra líferni Páls ekki til þess fallið að eyða með honum nótt. Þetta leiddi til þess að maddaman var afskaplega framlág í morgun og ekki í stuði að hitta þessa kavalera sína fyrr en um hádegi. Svo þegar endurfundir voru komnir á, þá brestur hér á með einhverjum ægilegum konsertum. Maddaman heyrir allt að því betur í músíkinni en þegar hún var á U2 forðum;o)

P.S. Nágrannar maddömmunnar eru greinilega líka stundum vakandi fyrri part nætur, fregnir bárust af því að 9 barnið á ganginum hefur hugsað sér að koma í heiminn í vor. Dæs dæs það er gott að maddaman er á leið í annað húsnæði þegar sumra tekur!

Maddaman hefur verið kitluð, en maddömuna kitlar ekki og þróaði með sér afburða tækni sem lítill púki að liggja kjurr og segja "mig titlar ekki, mig titlar ekki" alveg að missa sig úr kitli. Kitlarinn var náttúrulega Jökulinn sem ætlaði maddömuna lifandi að drepa með kitlum og látum!

7. hlutir sem að ég ætla að gera áður en ég dey

1. Ferðast meira um heiminn
2. Fara í Tungurnar
3. Sigla út í Bjarnarey
4. Eignast afkomendur
5. Skrifa bók
6. Gifta mig
7. Fara á Ólafsvöku


7. hlutir sem að ég get

1. Ég get allt sem að ég ætla mér með pjúra þrjósku!
2. Talað dönsku nánast eins vel og móðurmál mitt.
3. Keyrt traktor með ruslagámi aftan í og sópara framan á og bakkað honum!!
4. Farið niður í spígat
5. Haft ofan fyrir börnum, nánast hversu erfið sem þau eru!
6. Verið skuggalega þrjósk
7. Verið mjög fljót að lesa bækur


7. hlutir sem að ég get ekki

1. Rúllað tunguna
2. Staðið á einum fæti og haldið jafnvægi lengi
3. Hætt að vera langrækin
4. Tekið margar armbeygjur í röð
5. hætt að borða súkkulaði
6. bakkað inn í lítil stæði...
7. talað frönsku


7.hlutir sem að ég heillast af við hitt kynið

1. Húmor
2. Glimt i øjet
3. Hendur sem að líta út fyrir að hafa tekið á skóflu.
4. Greind
5. Hæfileika til að hvíla í sjálfum sér
6. Falleg augu
7. Dugnað

7. frægir sem að heilla

1. Ben Affleck
2. Mads Mikkelsen
3. Ulrich Thomsen
4. Georg Clooney
6. Halldór Laxness
7. Vigdís Finnbogadóttir


7. orð/setningar sem að ég nota mikið

1. Ertu ekki rúskinn? (bara til að stríða fólki sem að heldur að það sé verið að spyrja hvort að það sé skinntegund!!!!!)
2. Hej, hvordan går det?
3. Þetta er ekki að gera sig.....
4. Det er da skidegodt.....
5. Jæja vinskapur......
6. Øresundskollegiet, adminastrationen det er Cecilie......
7. Nei sko sjáðu til.....

7. hlutir sem að ég sé

1. Sé nú yfir rúmlega helminginn af íbúðinni.....eldhúsið, stofuna og vinnuaðstöðuna!
2. Skenkinn minn fína
3. Sjónvarpið með Frasier í
4 Kertastjakana
5. Vatnsflösku
6. Úrið mitt
7. Græjurnar

Þetta var mjög tímafrekt og maddaman nennir ekki að abbast upp á fólk með þessu kitli!

Twinkle twinkle little star.....

Maddaman fékk netpróf í dag sem að hún leysti samviskusamlega, hvaða fræga mann hún vildi deita. Að sjálfsögðu kom George Clooney upp og var maddaman mjög ánægð með það, enda hefur hún vitað lengi að Clooney væri maður fyrir hana. Hann veit það bara ekki sjálfur!" Nú eins og allt kvenfólk varð maddaman að prófa það næstbesta og það var að sjálfsögðu Brad Pitt og þriðja valið var sjálfur James Bond (Pierce Brosnan). Maddaman getur svo sem látið þá duga ef að Clooney er ekki tilkippilegur!

Múha.....

Í staðinn fyrir að vaska upp...henti maddaman bara mest öllu leirtauinu!! Ógeðslega sniðugt..hér eftir ætlar maddaman bara að láta bjóða sér út að borða!!! Er með góðar hugmyndir um staði fyrir áhugasama!

Støvlerne......

Stígvélin eru í höfn....en það var ekkert kjöt inn í þeim;o(
Maddaman er búin að vera að hræra í skýrslum héraðs og landlækna í allan dag og langar mest að skálda bara í eyðurnar...þar sem hana vantar eitthvað bitastætt en maddömusystirin er búin að banna það en eins og stóru systur sæmir gætir hún velferð litlu systur í hvívetna!
Það er orðið Betlehemslegt niður í bæ og komið jóla Tívolí og svona. Samt finnst maddömunni aldrei vera eins mikið fát yfir afmælinu hans Jésú hérna og heima á Íslandi. Það er uvidað níska baunans sem að skýrir það!

FUKKKKKKKKKKKKK

Maddaman er búin að vera í vinnufötunum straight síðan "før fanden fik sko på" það þykir maddömunni skemmtilegt danskt orðtak, það útleggst á íslensku áður en fjandinn gat látið upp skóna. Í nótt ætlaði maddaman að leika á sjálfan sig og stinga af á djammið eftir að kvöldverkunum lauk, en féll á eigin bragði og þurfti að fara 4 sinnum út í nótt að opna fyrir villuráfandi sauðum. Þeim síðasta klukkan rúmlega sex sem að var glaðbeittur og spurði maddömuna hvort að hún væri ekki til í sofa hjá honum fyrst að hún væri búin að opna herbergið hans og væri hvort sem er þarna verklaus
.Maddaman hélt alveg kúlinu og leit á klukkuna og sagði, jú ekkert mál en villtu ekki bíða þangað til eftir klukkan 7 þá er komin dagtaxti!! Það var fátt um kveðjur af drengsins hálfu en maddaman flissaði sig inn í draumaheim. Dagurinn er síðan búin að vera afskaplega brösulegur vegna þess að tölvukerfið sem að stýrir opnunum á hurðunum bilaði í nótt (sem að skýrir allar þessar ferðir í nótt). Þannig er maddaman búin að vera stanslaust á hlaupum að hleypa fólki út og inn. Ekki gekk ruslatakan neitt vel, endaði með smá minnihátttar vinnuslysi og maddaman tilkynnti le inspector að ef að hann ræki hana ekki í fyrramálið þá mundi hún sjálf segja upp!!!
En út af öllu þessu brauki er maddaman af Kaupmannahöfn í þessum töluðu orðum að missa af 2 ára afmæli Krónprinsins af Hróarskeldu. Maddaman lýsir hér með yfir harmi sínum að gera ekki verið viðstödd en lofar að koma með pakkana þína eins fljótt og unnt er. Knús frá Köben

URRRRRRRR

Skammdegisþunglyndið er búið að fánga maddömuna og það gerist ekkert skemmtilegt. Maddaman er að aðallega að túlka gömul lög (ekki sönglög lömbin min) og dröslast um með Brand á lyklaborðinu. Hápunktur dagsins er að fara út og veiða í kvöldmatinn sem að svo sannarlega misheppnaðist hrapallega í kvöld. Maddaman var rétt búin að veiða sér klofhá leðurstígvél í kvöldmatinn. Sér fyrirsögnina......sveltandi námsmenn í Kaupmannahöfn grilla leðurstígvél á teini og hafa túmatsósu með. Kannski fer maddaman aftur á veiðar...hvur veit. Börnin öskra sem aldrei fyrr þrátt fyrir að maddaman reyni að veita þeim tiltal þegar hún gengur um ganginn og hræða foreldrana með því að koma æðandi út í dyr með ljótan svip þegar þau reka upp hæstu gólin.
Eldheitu ástarsambandi maddömunnar og Pakistanans er hér með formlega lokið. Maddaman mun hér eftir sækja vikulegan skammt sinn af AFD annað. Maddaman getur bara ekki staðið undir því andlega að vera með opna vinalínu fyrir bláókunnugan mann og stórfjölskyldu hans í Pakistan einu sinni í viku! Og skammist þið svo til að kommenta hérna ef að þið viljið ekki bera ábyrgð á andlegu ritmorði maddömunnar!!!!

Tiltektir

Maddaman horfði á Allt í drasli áðan sér til hressingar. Þar var verið að taka til hjá Önnu frá Hesteyri í Mjóafirði og var það prógramm í heilum tveimur þáttum. Þetta var mikið góðverk að taka að sér að ryðja út hjá gömlu konunni því að satt best að segja hefði ég trúað sjónvarpsstöðinni til að afþakka þetta verkefni. Hins vegar vonar maddaman að framvegis fái konan einhverja félagslega aðstoð til þess að halda þessari tiltekt í horfinu og jafnvel aðstoð til að hressa eitthvað upp á þetta húsnæði. Maddaman ætlar ekki að dæma dýrahald innabúðar, þrátt fyrir að það hafi aldrei verið praktíserað í Sumarhúsum nema verið væri að hlýja litlum lasburða lömbum (fyrirburar nútímans). Maddaman vildi þó frekar hafa rollur en mýs innanbúðar hjá sér (veit hins vegar að Anna er líka búin að prófa það)Hins vegar er svona umgangur ekkert einsdæmi og fólk þarf ekkert að ganga af göflunum neitt vegna þess.

Eins og þrír úldnir hundar.....

Maddaman er búin að vera mygluð í dag...það er líka haustlegt hérna rigning og svona. Það er allt doldið blúsað hérna um þessar mundir, póstkassinn fullur af reikningum alla daga, eins og maddömuna vantar nýjan kjól og stígvél fyrir jólafrúkostana alla! Maddaman lagði sig eftir hádegið því að ef að er líffæraverkfall hjá henni (eins og oft kom fyrir Sobeggi afa) þá elur það af sér einstaklega frjóa hugsun. Maddaman varð bara dragúldin af þessari lagningu.
Ekkert gengur að finna ástina í lífi maddömunnar en hins vegar er bæði búið að gauka að henni adressu á ljósmóður í Kaupmannahöfn sem að selur kynfrumuna sem maddaman á ekki í pússi sínu til að geta af sér afkomendur! Gaman af því, allavega ef að ekki tekst að finna neinn til að gera þetta viðvik er adressan í höfn. Þetta er svipað verð og á einum almennilegum hælastígvélum!!!! En miðað við öskrin sem að krakkagerpið hérna á ganginum framleiðir þá reiknar maddaman með að fá sér möööörg pör af stígvélum á undan........
Eina jákvæða í lífi maddömunnar er að það er búið að bjóða henni starf að loknu námi. Það er í líkingu við starf seðlabankastjóra er ekki auglýst heldur losnar bara á heppilegum tíma!!! maddaman á bara eftir að afþakka eftirlaunin;O)
Madddaman úldin og stúrin......

Til góðs vinar liggja gagnvegir.....

Maddaman er komin heim í Heiðardalinn! Ahhhhh svooo gottt!!!
Þrátt fyrir að hafa verið með fuglaflensuna nánast allan tímann, náði maddaman að vera mikið með góðum vinum sínum, prófa alla sófa og rúm hjá þeim og snýta upp öllum lambapappírnum þeirra, drekka koníakið þeirra og borða verkjalyfin þeirra.
Maddaman er svo heppin að hún á alvega einstaklega góða vini sem að Guð gaf henni og hann var ekki að spara við Maddömuna þann daginn. Maddaman var að hugsa um það í flugvélinni sem og oft áður hvað hún væri heppin kona að eiga allt þetta góða fólk fyir vini;o)

Kvennadagur...

Maddaman situr á heitum reit á Borgarbókasafninu þar sem að hún hefur verið að vinna í dag. Maddaman er umvafinn karlmönnum því að stallsystur hennar eru úti að berjast fyrir betri kjörum kvenfólks. Maddaman treystir sér ekki enda búin að liggja fyrir lífinu ( eins og einn fjölskylduvinur orðaði það svo skemmtilega) í rúmum og sófum vina sinna í marga daga. Maddaman myndi vilja vera hérna á Borgarbókasafninu það sem eftir lifir ævinnar, hér er svo gott að vera.

Forsjálni

Það var gott að borgað var inn á vagninn, því að krílið haskaði sér;o)
Litlir krónprinsar fæddust báðum megin við Atlandshafið sitt á hvorum tímanum:o)

;o)

Maddaman arkaði á barnavagnastofnunina og borgaði inn á barnavagninn áðan. Það má sækja tryllitækið á miðvikudaginn. Þá er nú bara að vona að krílið haski sér......

Paranójur og skeptíkur (ný tíkartegund)

Tæknimenn maddömunnar segja að það sé lygileg umferð á þessari síðu.
Hummmm....... maddaman er strax skeptísk og er hrædd um að Stasi sé að fylgjast með henni, svarnir óvinir hennar séu að safna í sarpinn til að nota gegn maddömunni þegar hún verður orðin frú fræðingur, gamlir ástmenn séu "með hefði átt að kunna gott að meta" glott yfir ofsóknum Pakistans og annara morubotna, og yfir höfuð séu menn að safna glóðum til höfuðs maddömunni. En þetta hljómar dálítið eins og brot úr Píslarsögu Jóns Magnússonar.
Annars er gott að vera rolla hér núna sökum mikillar blíðu og það er líka gott að vera vínþrúga vegna sólarinnar( minni sykur í vínið) og síðast en ekki síst er gott að vera Maddama í Köben!

Annars ef að menn vilja fá komment þá verður maddaman alltaf að skrifa eitthvað krassandi og nú kemur sagan sem maddaman var eiginlega búin að lofa sjálfum sé að blogga ekki um af því að hún brýtur í bága við mörg af hennar fágætum prinsíppum en hún hefur vakið svo mikla lukku í munnmælum að nú getur maddaman ekki stillt sig lengur.

Á þessum tíma í fyrra reyndar aðeins fyrr þá var maddaman mjög hrjáð af magaverkjum og undarlegum úrgangi. Þetta upphófst í lok Bandaríkjareisu maddömmunar og hélt áfram í mánuð eftir heimkomuna. Þetta fannst maddömunni gríðarlega mikið ófremdar ástand og ákvað eftir 3 vikur af þessu endurtekna efni að vitja títtnefnds dýralæknis.
Var hann sóttur heim og kynntur fyrir þessari skemmtidagskrá, jafnframt teoríum um að amöbur og bandaríks sníkjudýr væru að hreiðra um sig í rúmgóðum þörmum maddömunnar. gaf lítið fyrir það, taldi maddömuna hafa verið í svo góðu appelsínufylki (smekkmanneskja) að engin hætta hafi verið á dýrum sem að sníkja.
Hins vegar var alveg nauðsynlegt að fá sýni úr maddömunni til að skoða þetta mál.
Ekki leist maddömunni nú sérlega vel á það af mörgum ástæðum sem óþarft er að tíunda hér. Allt um allt dregur Dýri upp sérlega vandaða plasthólka ekki ósvipað töluhólkunum í vefnaðarvörubúðum og skenkir maddömunni.
Maddaman spurði Dýra varlega hvað ætti að gera af hólkunum þegar búið væri að koma þar til gerðu stöffi í þá (sá fyrir sér að dýri analyseraði þetta á eldhúsborðinu á kvöldin við léleg birtuskilyrði). Já bara að bíða hæg hérna, því að nú væri hann að veiða upp úr skúffum sínum sérhannað umslag til að pota hólkunum í og svo ætti maddaman barasta að senda þá með dönsku póstþjónustunni!!!! Maddaman sem að oft hefur lesið Sögu Landpóstanna og vissi að margt var á þá lagt allt frá ástarbréfum til hangikétslæra og að þeir hefðu marga fjöruna sopið en hún hafði sannarlega aldrei heyrt þess getið að þeir hefðu ferðast um með saursýni milli landshluta.
Eins og gefur að skilja hefur maddaman frábeðið sér allar matarsendingar frá gamla landinu og forðast illa lyktandi reikninga eins og heitan eldinn!
Þegar farið var að kryfja Dýra um útkomuna á sýninu kom í ljós að þessi stofnun var verulega interesseruð í allavega tveimur sýnum til viðbótar. Daginn eftir að þær upplýsingar bárust snarbatnaði maddömunni og hefur ekki kennt sér nokkurs meins síðan!

Stál&Hnífur

Maddaman fór á tónleika með Bubba á Bryggjunni í gærkveldi. Þetta eru aðrir tónleikarnir í tónleikaþrennu sem að haldin er. Það var mjög góð mæting og maddaman er hálf móðguð fyrir hönd K.K. sem að reið á vaðið og var fámennt hjá honum sennilega þó vegna þess að auglýsingarnar um viðburðinn voru seint á ferðinni. En hvað um það Bubbi var fínn, hann var mest í Brynja ég elska þig NOT pakkanum sem er líka bara alltílæ.
En maddaman var alveg að fara á límingunum yfir öðrum tónleikagestum og þeirra hegðunarmunstri. Það voru stelpur fyrir aftan okkur (maddaman og fygifiskar sátu á næst aftasta bekk) sem að lögðu ekki aftur á sér hvoftana alla tónleikana og tróðust fram og til baka að sækja bjór og koma honum frá sér og guðmávitahvað. Yfir höfuð var óstjórnlegt ráp á öðru fólki fram og aftur. Tveir menn lágu með höfuð fram á bringu sína og sváfu og annar þeirra var að bresta inni í einskonar kæfi(u)svefn sýndist maddömunni
þegar Bubbi var svo ósvífinn að vekja hann með háu góli! Svona fólk á bara að vera heima hjá sér og hrýta þar og hana nú!

Glóðaraugu maddömunnar eru hins vegar að verða horfin og hún er hætt að falla inn í statistík um að þriðja hver kona í heiminum búin við heimilisofbeldi!

Every day is a holiday.....

Maddaman heldur að hún sé búin að gera öll góðverkin sín í dag og rúmlega það. Fyrst að hlusta á fyrirlestur upp á Bispebjerg á mjög ókristilegum tíma, svo út á Vesterbrogade. Gera við uppþvottavélina í Sumarhúsum gegnum síma;o)
Dröslast aðeins með arftaka Páls um lyklaborðið.
Ræða erfið heimsmál við góða vinkonu. Svo út að spássera í góða veðrinu seinnipartinn kringum vötnin til að fá hreyfingu og tæma hugann. Svo í vinnuna seinniseinnipartinn. Taka púlsinn á eróbikkinu, aftur út að labba smá spöl með annari vinkonu og taka stöðuna hjá henni og í Kardimommubænum. Móttaka sms frá góðri vinkonu sem heyrði 4 hjartað í fjölskyldunni sinni slá ofur varlega í dag. Gleðjast með henni í huganum og í smáskilaboðum. Þrusast í sturtu, blessa yfir Pakistanann eina ferðina enn( sem byrjaði föstuna í dag og systirin enn að vasast í Saudi-Arabíu passalaus) !Desperate Housewifes í kvöld, reikningshald og margt fleira skemmtilegt og fullt eftir af deginum. Svona eiga allir dagar maddömunnar að vera þétt skipaðir af leik og starfi!

Á snúrunni...

Það eru komnar fleiri snúrur í líf maddömunnar og á heimili hennar, en samt til að losa hana við eina leiðinlega snúru, þurfti aðrar snúrur. Maddaman er komin með þráðlausa nettengingu og getur núna legið í fleti sínu meðal annars og skrifað samtímasöguna. En mesti kosturinn er þó að þurfa ekki að strekkja snúrurnar yfir allt heimilið þegar setið er að verki við eldhús/vinnuborðið við skriftir!
Þetta kostaði mikið pirr og vesen og límingarnar á maddömunni alveg að gefa sig en þökk sé vasklegum framgangi Brennu-Böðvars þá gekk þetta upp.
Í gær var maddaman með bjóð og var það mikið fjör. Börnin sem voru í bjóðinu voru (og eru að eðlisfari) svo stillt og góð að annað eins hefur vart sést í Evrópu gjörvallri. Það er gaman að halda bjóð og maddaman ætti að gera meira að því, kannski ætti maddaman að stefna að því að halda jólabjóð næst.
Takk fyrir komuna;0)

Payday

Magga drottning (ekki Magga massi þó) var að massa út úr hraðbankanum klukkan 10:00 í morgun áðan þegar maddaman hjólaði niður á Höjbro plads. Maddaman var að sjálfsögðu rétt búinn að hjóla á Bensann í flumbruganginum;o) Maddaman spyr sig hvort að hún hafi verið á kúpunni eins og við hin?????

Af fjölærum urtum og elliærum mönnum!

Það er ekki þverfótað fyrir óheppilegum karlpening í lífi maddömunnar um þessar mundir. Ekki er nóg með að Pakistaninn sé í ofskvíðakasti í hvert skipti sem að maddaman nálgast búlluna og þurfi að láta hana koma með vasasálfræðina sína og góðu áruna heldur tókst henni að æsa blómasalann á horninu til dáða á sunnudaginn. Blómasalinn er rétt rúmlega meðal dvergur af Austur- Evrópskum ættum og á konu sem er gríðar rassíð og mikil skrukka og þegar hún er í búðinni er hann eins og mús undir fjalaketti og hvorki æmtir njé mjæmtir.
Hinsvegar þegar hún er heima stödd að hræra í pottunum notar hann tækifærið og reynir hraustlega við stelpurnar í hverfinu. Allt um allt var maddaman stödd þarna á sunnudaginn að kaupa fjölæra urt til að fara með uppfóstur í betri úthverfi borgarinnar.
Maddaman var að sjálfsögðu vellyktandi að vanda, nýkomin úr sunnudagsruslabaðinu og hafði notað baðolíu úr krukku 117 (myndi kona Sumarhúsabóndans nefna hana) og að sjálfsögðu með ilmvatn í stíl. Nema hvað að blómasalinn kom æðandi og gólaði hásri röddu að maddaman lyktaði afskaplega vel í dag og betur en blómin hans (enda tómir kaktusar og njólar eftir síðla sunnudags sýndist maddömunni) og hann krafðist þess að fá að vita nafn og uppruna þessa vellyktandi dollu, sjálfsagt til að gleðja skrukkuna. Maddaman tafsaði það í hann og þá kom nú hápunkturinn, blómasalinn tjáði maddömmunni að honum finndist þetta afskaplega kynþokkafull lykt!!! Maddaman varð algjörlega ofandottin við þessar upplýsingar.
Nú er það nú einu sinni þannig að maddaman er komin af fólki í marga ættliði, er henni nær að halda sem að bruðlar ekki með kynþokka sinn og hefur heldur ekki verið talið reiða hann í þverpokum hingað til. Þessum sömu langfeðgum hefði heldur aldrei dottið til hugar að koma beinum orðum að slíkum þokka þyrftu þeir að tjá sig um það heldur hefði verið farin Fjallabaksleið hin syðri (eða síðri!!) til að koma slíkum skilaboðum á framfæri helst íbland við veðurskeyti og aðrar tilkynningar! Þetta var því ný upplifun fyrir aumingja maddömuna.
En hvað um það, það er allavega ljóst að það er engir Aríar á biðilsbrókum þessar mundir heldur morubotnóttir lítt ákjósanlegir piltar.

Biskupsstofa rúlar....

Nú eru skjalaverðir á Biskupsstofu að liðka fyrir um ferðalög Páls heitins Pálssonar ( hvur ekki stafar frá Bóli). Það komu þarna óheppilegar eyður í líf hans sem að maddaman grunar að guðsfólkið geti skýrt.
En fyrrum landlæknir lætur ekki heyra frá sér, spurning um að ofsækja hann eitthvað frekar!!

Familybissness

Maddaman var með allri fjölskyldu sinni á ferð í nótt ( það hefur reyndar ekki gerst að hún sé sameinuð síðan yngri systurdóttirin gekk úr lið á jóladag 1993) en þá er Adams fjölskyldan til á filmu! En auðvitað voru ekki allir saman, heldur óku menn um á sitt hverri druslunni og maddaman var að sjálfsögðu farþegi eins og alltaf. Nema faðir vor hann var fótgangandi og stórstígur að vanda. Tengdabörn og barnabörn sáust heldur ekki enda barnabörnin ekki með bílpróf!

Klukk

Maddaman rak augun í það áðan að Hjalti góðvinur hennar hefur klukkað hana og þá á viðkomandi að telja upp fimm staðreyndir um sjálfan sig.

1. Maddaman var orðin 27 ára gömul þegar hún fékk uppáskrifuð sýklalyf í fyrsta skipti. Það var þegar Neðra-Hné kom til sögunnar og það dugði ekki minna en þrír skammtar til að sjatla það mál.

2. Maddaman er eins og sá sem klukkaði hana með hægri fótinn styttri og það uppgötvaðist sömuleiðis þegar hún var 27 ára og hún gengur líka með innlegg....þegar hún þarf ekki að vera í pæjuskóm sem er mjööög oft!

3. Maddaman var á heimavistarskóla frá því að hún var 7 ára þar til hún var 21 árs gömul þó með eins árs hléi þegar hún var í 4. bekk í ME. Maddaman deildi alltaf herbergi með öðrum og telur það vera ástæðuna fyrir því að hún hefur aldrei prófað sambúðarform síðan. Kvótinn er sennilega bara búinn!

4. Maddaman kunni alla stafina þegar hún var 3 ára og var allæs þegar hún var 4 ára. Hún hafði aðgang að bókasafni foreldra sinna sem að var ekki bara fyllt með barnabókum. Þess vegna las maddaman Íslenskar ljósmæður þegar hún var 7 ára, slóst við maddömmumóðurina um Dalalíf þegar það var endurútgefið og las ævisögu Lárusar í Grímstungu með áfergju þegar hún kom út.
Maddaman les ennþá mikið en er yfirleitt ekki hrifin af bókum sem að fjöldinn er að rifna yfir. Eins og til dæmis Da Vinci lykilinn. Ein af aðalástæðum þess að maddaman hlakkar til að flytja á klakann aftur er að maddaman getur lesið upp öll árin sem að hún er búin að missa úr í íslensku bókunum!

5. Maddaman ætlaði sér að verða rithöfundur þegar hún var yngri og innblástur af ljósmóðurbókalestrinum gerði líka að verkum að hún var að hugsa um að verða ljósmóðir. Ljósmóðir verður hún ekki úr þessu en rithöfundardraumurinn er enn til staðar en gallinn er bara sá að maddömunni finnst vera búið að skrifa allt sem þarf að skrifa. En eins og er er maddaman harðánægð með að vera alveg að verða talmeinafræðingur!

Maddaman klukkar Elsu frænku sína, systurdætur sínar báðar, Perlu frænku sína og Gazza spassa og er hann þó ekki í frændgarðinum!!

Dýrið gengur laust....

Maddaman og Neðra-Hné fjölmenntu til dýralæknis í dag. Dýralæknirinn var reifur og kátur að vanda en hann hefur töluvert spé fyrir maddömunni! Maddaman taldi upp ýmsa kvilla sem að hún hefur safnað í sarpinn handa Dýra. En aðalkvillinn er þó Neðra-Hné sem að hefur nú verið eins og síamstvíburi maddömunnar í 14 mánuði tæpa. Dýri mældi Neðra-Hné með gömlu málbandi og eitt augnablik varð maddaman dauðhrædd um að hann ætlaði bara að sauma litla krossaumsmynd yfir bólstraða marblettinn og láta þar við sitja. En svæðið var of abstrakt og Dýri ráðlagði sónar fyrir Neðra-Hné til að reyna að kynnast holrúmi, kalki og 14 mánaða gömlu blóði sem gæti leynst þar. Í kjölfarið af því fimbulfambaði hann um skurðaðgerðir til að losa maddömuna við þetta lýti, en Dýri heldur að maddaman sé nútíma kvendi sem tilbúin sé að láta höggva, skera og plokka til að passa inn í kröfur nútímans. Maddaman útskýrði fyrir honum að maddaman hefði engan hag í því að þessi partur af skankanum liti eitthvað sérstaklega vel út, þar sem að maddaman væri hvorki atvinnufyrirsæta né strippari (þarna glotti Dýri svo hroðalega að sjá mátti alla samtímasögu tannlækninganna á einu bretti) og hún væri sérlegur andstæðingur þess að menn væru með hnífa á lofti að óþörfu nema í eldhúsinu.
Hins vegar hefðu steinolíuþerapíur gefist vel til skottulækninga í hennar fjölskyldu gegnum tíðina. En mál málanna væri það að maddaman kenndi ennþá til á þessu stykki 14 mánuðum seinna við ákveðnar aðstæður til dæmis iðkun íþrótta og í þau skipti sem að menn, hundar eða borðshorn sýna þessu svæði óþarfan áhuga. Maddaman og Dýri sammæltust um að gefa Neðra-Hné hálfs árs frest til að jafna sig og athuga þá með sónarinn.
Síðan kynnti Dýri að eigin frumkvæði skemmtilegan getnaðarvarnahring fyrir maddömunni sem að maddaman sýndi fremur lítinn áhuga enda skutlaði Dýri honum bara til baka aftur á stútinn á þvagflöskunni og sagði afsakandi við maddömunna að hann notaði þetta nú bara til að skreyta með stútinn! Maddaman sagðist fastlega hafa reikna með því hann notaði þennan hring ekkert sjálfur þar sem að hann væri sérstaklega ætlaður fyrir leggöng. Dýri hvatti svo maddömuna að lokum til að koma eins oft og hún þyrfti á að halda!

Pakistaninn á kombakk.....

Þetta er búin að vera langur og strangur dagur, fyrst í háskólanum og svo í aukavinnunni. Þar var maddaman með félagsráðgjöf fyrir konu í Árósum sem að ætlaði aldrei að hætta ræða við hana um húsnæðisvandamál dótturinnar sem að enginn skilur betur en maddaman hvursu erfitt það er að eiga hvergi höfði sínu að halla í ókunnugum borgum. Maddaman ráðlagði henni allt hvað hún gat og flæktist að sjálfsögðu inn í fjármál fjölskyldunnar fyrir vikið.
Þegar búið var að leysa þetta ákvað maddaman að hressa sig við og ná í vikulegan skammt sinn af AFD sem eru ekki eiturlyf heldur skammstöfun fyrir Alt for damerne sem er afskaplega fínt dömublað. Það sækir maddaman til Pakistanans sem að bókstaflega brjálaðist af gleði yfir að sjá hana og benti á höfuð sér og sagðist vera mjög klikkaður í höfðinu í dag og maddaman ætti að hjálpa honum að leysa það. Síðan smalaði hann öllum vinum sínum út úr bakherberginu og sagði maddömunni að hann yrði að ræða við hana fjölskylduvandamál!!! Maddaman hrökklaðist þarna inn (maddaman hefur all verulega yfirburði í stærð&þyngd&kröftum engar áhyggjur) og svo sagði hann maddömunni frá ástandinu á systur sinni í Saudi-Arabíu og plönum hennar um að flýja til Pakistan. Maddaman hrósaði honum fyrir að ætla að hjálpa systur sinni og börnunum til ættingjanna í Pakistan frá vonda eiginmanninum og hann tárfelldi af gleði yfir gæðum maddömunnar og sagði henni að hún bæri góða strauma með sér og gæfu! Síðan sagðist maddaman þurfa heim en hún hefði lofað Skagfirðingnum söngelska að vera fljót í förum!!!! Stundum finnst maddömunni að hún sé leikari í bíómynd þar sem að ekki er stuðst sérstaklega við handrit.

SMS

Maddaman ætlar að blogga aðeins til þess að gleðja mannkynið.
Maddaman er með síma í láni frá glæpafyrirtækinu sem að hún kaupir af símaþjónustu.
Sá sími heitir Nokia tralalala eitthvað og er miklu betri en Motorola sími maddömunnar ( sem að hún hefur aldrei lært almennilega á og finnst hann þess vegna ómögulegur). Motorola síminn er nefnilega í viðgerð vegna þess að skjárinn á honum va alltaf "svooooona blár"( minnir maddömuna bara á Sódómu Reykjavík:0)
Allt um allt er maddaman með þetta tæki undir höndum og var að senda svokallað smáskilaboð og vildi ganga úr skugga um að viðkomandi persóna hefði móttekið þau. Fer í þar til gert box sem að sýnir manni send skilaboð. Þá sér maddaman mikið af skilaboðum sem að greinilega tilheyra fyrrum lánshafa sama símtækis. Maddaman ákvað að fara aðeins í persónunjósnir og varð heldur betur margs vísari.
Konan sem að var með símtæki fór í andlitsbað og nudd á milli 16 og 17 1. september sl og gat þar af leiðandi ekki hitt vinkonu sína á kaffihúsi. Hún mælti sér þess í stað mót við hana seinna. Hún staðfesti boð um að koma í matarboð seinna í vikunni og mælti sér mót við Peter á Bryggen klukkan 16:15 einhvern daginn. Sömuleiðis upplýsti hún einhvern annan um að hún væri búin að mæla sér mót við sama Peter. En rúsínan í pylsuendanum er sú að konan er í eldheitu ástarsambandi við Sören og tjáði honum í mörgum lööööngum skilaboðum um ýmsar holdlegar fýsnir sínar og hverju Sören mætti eiga von á þegar hann drattaðist heim úr vinnunni (sem að maddömunni skildist að sliti óþarflega mikið sundur daginn fyrir þeim!!!).
Til allra hamingju er þetta líf bláókunnugs fólks sem að um ræðir, þrátt fyrir að maddaman hafi séð fullt nafn konunnar. Maddaman er hins vegar svo mikil risaeðla í sér að hún myndi sennilega aldrei senda söngelska, drykkfellda Skagfirðingnum svona skilaboð. Þetta vekur maddömuna líka til umhugsunar um hvað númtíma tækni hefur breytt öllum samskiptum fólks. Til dæmis ef að H.C. Andersen hefði bara getað smassað á gelluna sem að hann var að missa vitið yfir þá hefði hann aldrei spænt upp heilt skópar á að rölta í götunni hennar í von um að sjá henni bregða fyrir.
Jónas hefði aldrei ort "Nú andar suðrið" og langa langa amma hefði aldrei sest að Syðri-Vík og allt hefði þetta breytt mannkynssögunni heilmikið.
Maddaman í miklum pælingum!!!!

Mannlífið...

Það er segin saga að þegar maddaman kemst loksins með kíló af hassi að fíla náttúruna þá fær hún aldrei frið til að fílósófera fyrir öðru fólki. Þá dragast eins og seglar að stáli að maddömunni allskonar fólk og dýr. Hundar sem að þurfa að þefa af henni eða bara pissa smá utan í hana. Gamlar konur sem að þurfa að spjalla, fólk að spyrja til vegar, einstæðingar sem að ekki hafa marga til að tala við, gamlir tannlausir menn, rónar að betla péning og öll mannlífsflóran. Maddaman reynir samt að ræða við alla af alúð þó að stundum langi hana meira að huxa í friði eða bara horfa á fólk sem að henni finnst skemmtilegt, bara til að skoða hversu ólík við erum öll.
Annars bárust madömmunni ánægjuleg tíðindi í dag, niðurstöður eru komnar úr stolna prófinu og reyndust þær gríðar jákvæðar og maddömunni til framdráttar. Ólympíunefnd mun þó sennilega ekki falast eftir henni, en hvað um það;o)

Spesíur og nýjar krónur....

Maddaman er stundum alveg gríðarlega leið á smásálarhætti Dana sem að lýsir sér í mörgu td:

að drottningin tímir ekki að láta lita á sér hárið né flikka upp á skögultennurnar

að lágmark er að tveir noti sama tepokann og svo á helst að föndra eitthvað úr honum seinna!

að menn hjóla/keyra óravegu til að kaupa matvöru á tilboði í fimm mismunandi matvörubúðum og allur seinni parturinn af deginum fer í að smala saman í kvöldmatinn og menn sjá ekkert eftir tímanum sem í þetta fer!!

að menn rukka fólk um 5 kalla sem að menn hafa lánað (u.þ.b. 51 íslenskar nýkrónur)!

að menn koma í sérstakan sparnaðarþátt í sjónvarpi til að grobba af því hvað menn hafa sparað við að grafa aldraða feður sína með því að leggja líkið sjálfir á öxlina og spásséra með yfir í líkbrennsluna (plús fyrir að hafa ekki bara kveikt bál í garðinum heima enda sennilega bannað með lögum) og senda gamalmennið svo af stað í sitt síðasta ferðalag í stórri rauðkálskrukku (afþví að að þessar sérhönnuðu krukkur eru svo miklu dýrari!!) og finnst það bara allt í lagi!!

að það eru gefnir út sneplar sem að ráðleggja mönnum hvernig á að græða á því að halda partý með því að bjóða fólki að koma þegar það er búið að éta heima hjá sér, allir koma með áfengi með sér og borga túkall fyrir saltstengur og pappadúka og gestgjafinn kemur út í rífandi plús af því að hann getur selt allar flöskurnar sem að gestirnir skildu eftir!!

að fólki finnst það "eiga rétt á" því að fá allt frá kerfinu en finnst ágætt að það sé bara brot af fullvinnandi fólki sem er að vinna og borga svimandi skatta til að halda þjóðarskútunni á floti

Svona mætti lengi telja en allt þetta kom til vegna þess að í kvöld sá maddaman brot úr "Villtu vinna milljón" þar sem að fyrrverandi hjón komu saman til að reyna að græða pening og skorti víst ekki þáttakendur þar sem að Danir eru sú þjóð í norðrinu sem að getur státað af flestum skilnuðum (og flestum giftingum reyndar líka).
Þetta finnst maddömmunni vera lýsandi dæmi fyrir þessa þjóð þó að fólk hafi skilið í bál og brandi þá eru menn samtaka þegar á að fara að græða pening

Alþjóðatengsl....

Maddaman er algerlega vansvefta, þó ekki vegna nýburans;o) heldur allt vegna þess að "alþjóðlega konan" er komin aftur á stjá. Oh my god í mismunandi tóntegundum klukkan 3 á nóttunni er ekki góð vögguvísa! Maddaman var að vona að pilturinn hefði afskaffað kvendið fyrst að ekkert hefur spurst til hennar lengi!

Barnsfæðing

Klukkan níu í morgun, hringdi síminn og vakti maddömuna sem var með góðan draum í gangi eins og þar stendur. Á línunni er dönskumælandi kona sem segist heita Inger og vera heimahjúkrunarkona og óskar maddömunni innilega til hamingju. Maddaman þakkar fyrir auðsýndan hlýhug og spyr svo varlega hvað sé verið að gratúlera með. Heimahjúkrunakonan segir maddömunni það í fréttum að hún hafi fengið fax um að það um helgina að hún sé búin að fæða!!!! Jahá segir aumingja maddaman og stóð nokkuð um hvort ég eignaðist dreng eða stúlku?
Fyrir þessu hafði heimahjúkrunarkonan ekki spé og maddaman flýtti sér að segja að það væri ekki fjölgunarvon á hennar heimili henni vitanlega!!!
Í annan stað er eitthvert kvendi í Virgínu sem að kommentaði á síðustu færslu og hrósar maddömunni fyrir skemmtilegt blogg! Maddömunni fýsir að vita hvort að hún er vel að sér í íslensku!

the final.....

Maddaman hlakkar til að sjá vini og velunnara síðunnar á hælinu;o) Maddaman vonar að hún fái fallega hlýlega blámálaða stofu og bókasafn hælisins verð gott. Maddaman vil minna lesendur sínar á að hún er safna ritum HKL ef að þeir vilja færa henni eitthvað til afþreyingar á hælinu Maddömunni finnst líka Draumur góður!

ammmæli....

Kermit froskur er ný orðin fimmtugur, Lína Langsokkur varð sextug í gær og í dag er Sumarhúsabóndinn 5 árum betur en sextugur. Allar eiga þessar persónur það sameiginlegt að halda sér prýðilega miðað við aldur álag og fyrri störf.
Maddaman og systkini hennar gáfu Sumarhúsabóndanum göngustafi með dempurum og sjálfvirkum sleppibúnaði til að æða með í Tungurnar og Böðvarsdal og hvurt sem hann þarf að sækja skjátur sínar. Reyndar var Sumarhúsabóndinn langt á undan sínum tíma hvað varðar þessa göngustafamenningu, því að hann var farin að ganga við broddstaf löngu fyrir fermingu.
Sá hinn sami broddstafur spilaði gjarnan lykilhlutverk í flugeldauppskotum á gamlárskvöld ef að þessi smáprik sem fylgdu tolldu illa á og var þessi stafur eitt sinn rétt búin að setja reikistjörnu út af braut sinni og kom fyrir í drápu á þorrablótinu. En hvað um það þá finnst maddömunni Sumarhúsbóndinn ekki eins gamall og margir menn á hans aldri, hvurnig sem að það má nú vera og vonar að afmælisdagurinn verði honum bjartur og fagur og girðingarvinnan með öðrum ekki minni öldruðum félaga hans hafi verið honum uppspretta nýrrar andlegrar speki.
Sumarhúsbóndinn mun þó ekki lesa þessa rafrænu kveðju enda 18. aldar maður en reynt verður að ná sambandi við hann gegnum sæstreng í bítið í fyrramálið!

Skref...

Maddaman tók sín fyrstu skref í lífinu á jóladag 1977 dyggilega studd og undir vökulu augnaráði frænda síns, sem hafði áður á því herrans ári borið sig upp við maddömmusystur grafalvarlegur og fölur af áhyggjum út af maddömunni. Hún slefaði svo mikið og átti til að reka upp ýmis gól og hinn góði frændi hafði áhyggjur af því að þessi nýja frænka hans væri ekki heilbrigð en hann hafði hlotið fræðslu um að einkenni þroskaheftra barna væri gríðarleg framleiðsla á munnvatni. Maddömmusystir hafði verið fullorðin og lífsreynd kona í mörg ár þegar þarna var komið sögu enda heil tólf ár sem aðskilja maddömuna og hana og róaði frænda með því að þetta væri ofur eðlileg hegðun hjá kvenfólki á þessum aldri. Til eru myndir sem að sanna þennan gjörning af hnellinni stúlku með margar lærafellingar í fínum jólaskokk og hvítri blússu standandi við jólatréð og grunsamlega mikið af glansandi jólakúlum á gólfinu. Síðan hefur madddaman tekið fjölmörg skref í lífinu og veröldinni allri bæði ein og óstudd og einnig með stuðningi þegar þess hefur þurft við.

WTF

Urrrr þegar maddaman lét rifa í glyrnurnar á sér í morgun eftir mj.mj. erfiða nótt með Dysartri bækurnar sér við hönd, þá var vatnið farið af öllu húsinu, vegna þess að í annað sinn á stuttum tíma er sprungið rör í aðallögninni hérna í götunni. Síðast héldu þeir að það tæki 4 tíma að gera við, það tók 16. Núna þora þeir ekki að segja neitt! Maddaman þakkar fyrir ef að það verður komið vatn aftur um jólin. Þetta þýðir að allt persónulegt hreinlæti er í lágmarki og yfirhöfuð er maddaman hálf lömuð. En af því að maddaman er ógisslega jákvæð kona, þá þakkar hún guði fyrir að börnin hennar eru ófædd og að hún er ekki með 5 manna fjölskyldu í heimsókn, hvað þá aldraðar ömmur sína og afa eins og konan á efri hæðinni sem að hringdi í tómri ángist hér í morgun til að vita hverju sætti.
Maddaman ekki eins fersk og hún gæti verið!

Konunglegar veislur......

Maddömunni var boðið til veislu hjá drottningunni í nótt. Henrik prins gat ekki komið fyrr en í kaffidrykkjuna. Margrét Þórhildur bauð upp á steik með sósu og rauðbeðum. Ásamt madömunni var boðið til hófsins einni af dannaðri móðursystur madömunnar. Allt gekk vel þangað til að átti að fara að taka diskana af borðinu, madömunni þótti Móða og einhverjar hirðdömur stafla diskunum óþarflega kæruleyislega ( allt doldið lípó greinilega hjá drottningunni) og var eitthvað að biðja þær um að fara að fara varlega með þetta nema að sjálfsögðu steypist allt í gólfið og sósa út um allt. Maddaman brá sér í að þurka þetta til aðstoðar (alvön viðbjóðslegum félagsheimilisteppum eins og þessu hjá Margréti), nema stemmingin er doldið lævi blandin eftir þetta atvik og engin segir orð. Með kaffinu stóð til að kynna maddömuna og Móðu fyrir frönskum greifa. Nema þegar sósukaflanum er lokið og maddaman er búin að þurka sósu utan í Friðrik krónprins, þá kemur Móða uppleyst í gráti yfir þessu atviki og maddaman sem hefur nú marga fjöruna sopið vill gera gott úr þessu og segir að þetta geti komið fyrir alla og málinu sé reddað búið að þrífa teppið og sona! En þá fær maddaman pent að vita að svona komi eimitt EKKI fyrir hjá drottningunni af einhverri hirðdömu. Móða er í táradölum og þá missir maddaman nett stjórn á sér og skipar Móðu að láta af þessum væli og segir liðinu að hún voni að viðstaddir eigi ekki eftir að lenda í neinu alvarlegra í lífinu en að sulla sósu í gólfið. Því að það séu smámunir miðað við hvað geti komið fyrir fólk af alvarlegum hlutum. Svo skipar maddaman Móðu út úr þessu samkvæmi og ætlar sjálf að strunsa út á eftir henni. Þá kemur veltandi greifinn ásamt fleiri karlmönnum og fyrirfólkið viðist vera horfið með öllu. Maddaman kynnir sig fyrir liðinu og lætur greifann kyssa soldið á handabakið á sér og talar smá frönsku og tætir svo heim með móðu.
Ef að þetta hefði verið ævintýri hefði greifinn náttlega verið svo hrifinn af hugrekki maddömunnar að standa uppi í hárinu á liðinu að hann hefði gifst henni og gefið henni fullt af skargripum (í staðinn fyrir þá sem að stolið var í innbrotinu í vor). En þetta var draumur og greifinn slepjulegur gamall kall í grárri rúllukragapeysu og maddaman neydd til að fara aftur í kjallarann!

Så kom regnen og.......

Hér er ekki hundi út sigandi í orðsins fyllstu merkingu. Maddömuna sárvantar gömul próf sem eru niðri í lesaðstöðunni í kjallaranum á annari blokk; en hún er veðurteppt!!
Annars eru lesendurnir slappir að koma ekki með gisk og hér kemur annað sem að maddömunni finnst eðlilegt framhald: GlacierRiverHill og koma svo!

Hvar hafa dagar lífs míns lit sínum glatað...

Hvað er málið þegar spenna dagsins er orðin sú að fara og kaupa sér nýja vaxeyrnatappa til að geta farið heim og haldið áfram að lesa og að fara í bankann að díla við "hefekkifengiðþaðsíðan 1970sextugskrísu" kellinguna sem hefur takmarkað spé fyrir samstarfi milli danskra og íslenskra banka og yfir höfuð nordisk samarbejde og sennilega lítið spé fyrir maddömunni ef að út í það er farið!
Redding dagsins er samt SheepRiverHook sem að lesendur maddömunnar geta keppst um að geta hvað þýðir og sá hinn heppni getur fengið að koma og hlýða maddömunni yfir ýmsa heilasjúkdóma og drukkið með henni kaffibolla!
Jæja back to the basement!

And I still haven't found what I've been looking for......

Eitt er nú að hanga á byggingakrana í mótmælaskyni en að þurfa svo að fá hjálp frá fjandanum til að komast niður það er náttúrulega fyrir neðan allar eldavélarhellur! Annars heldur maddaman að hún sé jafnvel endanlega að tapa geðheilsunni hafi það fyrr skeð! En maddaman treystir því að hún muni sjá ljósið að nýju eftir rúma viku!

;o(

Maddaman er andlega steingeld í augnablikinu og fátt um það meira að segja! Innblásturinn af U2 dugði ekki nema rúmlega í einn dag!

U2

Well og well! Maddaman getur bara mælt með U2! Það var alveg að gera sig að vera með sæti og mátulega lenti maddaman undir þaki og slapp við rigninguna:o)
Annars var mikil útihátíðastemming í Parken vegna rigningarinnar.
Upphitunarböndin féllu maddömunni ekki að skapi (og mj.mj. fáum öðrum). Goðin létu reyndar ekki sjá sig fyrr en 21:45 but it was all the money worth!
Hinsvegar skilur maddaman ekki alveg að það séu tóm sæti á tónleikum sem uppselt var á í janúar! Einhver maðkur í mysunni þar!
Bono bauð hins vegar maddömunni ekki í eftirpartý, hafði hins vegar verið í partýi hjá Helenu Christiansen kvöldið áður, þar sem maddömunni var heldur ekki boðið!

Fjósaklettur

Það virðist sem aðdáendahópur maddömunnar hafi fjölmennt snemma á þjóðhátíð þetta árið. Maddaman og helstu brjóstbirtufélagar hennar gerðu reyndar heiðursmannasamkomulag um síðustu helgi að fjölmenna á þjóðhátíð í Eyjum á næsta ári "af því að hluti af klassískri menntun íslendinga er víst að hafa farið einhverntímann á þjóðhátíð". Enda hefur þorrinn af frumburðum fólks orðið til á þjóðhátíð og margir orðið að láta sig hafa restina!
Maddaman veit þó ekki hvað verður úr þessum plönum, hún er satt að segja engin rosaleg áhugamanneskja um þjóðhátíðir. Tók þó þó þátt í allavega einni ef ekki tveimur Eiða útihátíðum sem að sennilega hafa verið heldur glataðri en Viðeyjardæmið hjá Adda, Palla og Bergþóru um árið! Þar var svefnpoka maddömunnar stolið á fyrstu nóttu en maddaman gefur þó kredit fyrir að vínið sem var kyrfilega geymt í honum var skilið eftir! Jet Black Joe var aðalbandið ásamt GCD. Maddaman var líka þáttakandi í fyrstu Halló Akureyri hátíðinni sem haldin var öllum til skelfingar. Einhvern tímann var líka farið á Vopnaskak. Þannig að glöggir lesendur átta sig á því að þessi ferðalög hafa verið mjög landshlutabundin! En toppurinn hefði að sjálfsöguðu verið að vera í Atlavík með Ringó að rölta um árið en þá var maddaman rétt nýlega sloppin úr húfuskotti guðs og ekki samkvæmisfær. Sá eimitt í fréttablaðinu á dögunum að grínistinn Steinn Ármann hafði glatað sakleysi sínu á Atlavíkurhátíð (enda sennilega ekki mörg tækifæri á Borgarfirði eystra!!)
En maddaman heldur samt að Herjólfsdalurinn slái ekki U2 út!!!

;o)

Eldheitt samband maddömunnar og Pakistanans er upplífgað á nýjan leik eftir að maddaman þurfti að bregða sér mjög snöggt í sjoppuna hjá honum áðan. Maddaman gaf þó ekkert kost á sér í kaffi í að skiptast á sögum úr mismunandi menningarheimum og minntist þaðan af síður á að Pakistaninn hefði verið tekin til umræðu í grillveislu hjá maddömmufrænkunni á dögunum. Maddaman vonar heitt og innilega að sambandið fari út um þúfur þegar hann kemst að þeirri óumflýjanlegu staðreynd að Sumarhúsabóndinn á bara fótfráar rollur og engin lamadýr í heimamundinn.

:o)

Ljónið sem að dvaldi í íbúð maddömunnar hefur stillt inn ótrúlega mikið af einhverjum sjónvarpsstöðvum sem maddaman hélt að væri búið að leggja niður! Ekki það að maddaman hefur nóg annað að gera! Til dæmis að æfa sig mentalt fyrir U2 tónleikana, maddaman reiknar sterklega með að henni verði boðið á bakvið með Bono og maddaman og hann muni skiptast á minjagripum og heimilisföngum!

Hundadagar...

Maddaman er komin heim til sín eftir vægast sagt velheppnað sumarfrí! Hæst bar til tíðinda að einn sólríkan sumardaginn tókst maddömunni að læsa sig úti á tröppum aðaldyramegin á búgarði Sumarhúsabóndans. Það hefði þó verið sannarlega allt í góðu lagi ef að maddaman hefði ekki verið berrössuð á tánum eins og segir í laginu, en maddaman var í afskaplega skjóllitllum streng kenndum við G með eitt lítið og lúið handklæði sér til stuðnings á efripartinum! Þetta væri allt í allt heldur ekki fréttnæmt ef að búgarður Sumarhúsabóndans væri ekki óþægilega nálægt alfaraleið og maddaman telur að ekki færri en 15 bílar hafi ekið hjá meðan maddaman með annari hendinni hélt handklæðinu saman og notaði hina hendina og neðripartinn til að hamra á hurðinni sem að alls ekki opnaðist. En eftir drykklanga stund hrökk hurðin loksin upp og maddaman spýttist inn og kveikti skjálfandi á Rás 1 sem að meðal annars hefur það göfuga hlutverk að vara alla íslendinga við hverskonar náttúruhamförum. En engar tilkynningar bárust um að aka ætti hjáleið vegna þessara hamfara á tröppum Sumarhúsabóndans!
Hins vegar kom sá hinn sami bóndi seinna sama dag og sagði maddömunni ákaflega spaklega að hann héldi að umferðin hefði verið alveg með mesta móti daginn þann!

Júlíblogg

Það hefur svo margt á daga maddömunnar drifið síðan síðast að hún veit ekki hvar hún á að byrja. Allavega hafa góðir gestir frá Íslandi sótt hana heim undanfarnar tvær vikur. Maddaman fór til Rommeyjunnar á Vestur Jótlandi um helgina ásamt góðum vinum! Maddaman fann þó aldrei rommlindina þrátt fyrir ítrekaða leit ( enda ekki nokkur leið að skilja þetta fólk sem býr þarna!) og ekki einu sinni svo mikið sem feyskin rommkút! Mýflugurnar á Rommeyju sáu sér þó leik á borði að tappa af maddömunni íslensku fersku blóði og eru útlimir maddömunnar vægast sagt ófrýnilegir á að líta! Veðrið var eins og á póstkortum frá útlöndum, sól og blíða og ægilega fínt!
Aðaláhygjuefnið hér í landi er það hvort Bush sé með koddann sinn með sér eða ekki! Maddaman verður að segja að ef að þetta væru áhyggjurnar hennar þá væri henni ekki órótt!
Annars hyggst maddaman halda í víking bráðlega og hefur fengið sér ljón til að hafa í íbúðinni á meðan!

Maddaman hefur greinilega náð sér upp í blogghæðir því að tvö blogg sama daginn er nú óvenjulegt!
Vinkona maddömunnar sem flutt er til borgar bleytu og óttar kvartar sáran yfir því að makaleysi hennar fari mikið fyrir brjóstið á samferðafólki hennar. Hún er svo ólánssöm að mati samferðamanna sinna að vera makalaus og er henni nuddað upp úr þessu daginn út og daginn inn ásamt kommentum um að konur á hennar aldri ættu nú ekki að vera með sítt hár!
Það er nú ekki laust við að maddaman hafi fengið smjörþefinn af þessum söng gegnum tíðina.
Það voru skýr skilaboð um það þegar maddaman færi til útlanda að hún mætti ekki ná sér í danskan mann því að þá kæmi hún örugglega aldrei heim til íslands aftur ( fyrir austan sigldu nebbilega prestdætur stundum og giftust merkum dönum og sáust aldrei síðan en það var víst fyrir daga beina flugsins frá Kaupmannahöfn til Egilsstaða !!!)
Maðurinn á helst að vera hvítur eins og tunnumaðkur og sjálfsögðu verður hann að vera með íslensku tali! Hann má alls ekki eiga ættir sínar að rekja til hryðjuverkamann og eftir því sem maddömunni heyrist er synd að hún skyldi ekki vera samferðamanneskja Jesú Krists því að hann hefði sennilega komið sterklega til greina! (þetta með að kunna að breyta vatni í vín myndi vekja sérlega lukku í fjölskylduboðum!
Það er ber vott um frekar mikla þröngsýni að allir þurfi að vera í nákvæmlega sama farinu og lýsir kannski þessum gríðarlega smáborgararahætti íslendinga sem að þó vilja telja sig mikla heimsborgara.
Morgunblaðið kyndir undir þessu með að birta kannanir sem að segja gift fólk hamingjusamara og langlífara, í betri holdum og stunda meira kynlíf samkvæmt könnunum morgunblaðsins! Hið síðasta hlýtur nú að vera nokkuð sjálfgefið! Síðasta melding frá Morgunblaðsmönnum var að halda því fram að maddaman væri komin yfir meðal giftingaraldurinn sem ku vera 28 ára hjá kvenfólki en 30 ár hjá karlmönnum á Íslandi og hefur farið ört hækkandi.
Þetta æsir bara hamingjusama gifta fólkið í góðu holdunum upp í því að vera með allar klær úti við að kynna misjafnlega fráskilda bræður sem eru nú kannski ekki alveg gallalausir, dularfulla frændur sem eru kynntir eru til sögunnar sem" voða góður en sérstakur strákur" sem útleggst á maddamísku sem "tölvunördar sem eru algerlega veðurtepptir í mannlegum samskiptum og hafa aldrei verið við kvenmann kenndir" sem og afgamla "þroskaða" ( forpokaða) piparsveina sem að halda að snípurinn sé sjaldgæf fiðrildategund ( að undanskildum Kvískerjabræðrum þó en það skal tekið fram að þeir eru áhugamenn um fiðrildi, ekki er vitað um hitt!) og bara allt karlkyns sem að gengur laust! Boðskapurinn er að það verði bara að taka því sem býðst þegar maður sé komin á "þennan aldur" eftir því sem maddömmunni skilst fyrirfinnst orðið -líf með öllum forskeytum víst bara ekki eftir þrítugt! Málið er bara að þetta er engin brunaútsala þetta hjónaband, það er ekkert lagt upp bara með því að finna eitthvað og skítt með það hvort að það sé pínu brunnið eða götótt eða bilað. Maddaman trúir heldur ekki á ástina frekar en geimverur. Hins vegar trúir maddaman á það að tilviljanir ráði miklu um val lífsförunautar, hverjir eru hvar hvenær og eftir hverju eru þeir að leita. Enda heldur maddaman að hagkvæmnishjónabönd sé besta fyrirkomulagið á hjónaböndum, þessi ca. 60 ár sem að mannskepnan hefur verið að þreifa sig áfram í að stofna til hjónabands sökum óviðráðanlegar nýrnaveiki (alias ást) þá hefur skilnuðum fjölgað til muna! En maddaman segir eins og byggingarlánasjóður heitinn (eða er hann það ekki) allar umsóknir skoðaðar en réttur er áskilinn til að hafna öllum tilboðum"

Blogglægðir

Maddaman er búin að vera í gríðarlegri blogglægð undanfarið enda kverkaskíturinn nýfarinn og ekki víst að hann sé farinn forgúd! Góðvinur maddömunnar haraldur fór hins vegar forgúd í gær heim á fagra Frónið og ætlar að eigin sögn aldrei að snúa aftur eins og Gunnar forðum!
Maddaman náði sér hins vegar upp úr blogglægðinni í dag þegar hún lærði skelfilegt nýtt íslenskt orð sem er píkutryllir og var orðið víst notað um samtímamann maddömunnar bakarastubbinn Jóa Fel. Maddaman reiknar þó ekki með að hún muni slá mikið um sig með þessu nýja orði en hún er ekki mikið fyrir að nota nýyrði og aukin heldur eru kannski ekki mörg tækifæri til að viðra þetta orð!

Útburður taka IIII

Enn einn útburðurinn í morgun á góðkunningjum maddömunnar! Maddaman og Brennu-Böðvar fylktu liði í útburðinn og gekk hann vel! Hins vegar fannst maddömunni hún ekki vera í góðu dagsformi við útburðinn og skildi ekkert í þessu fyrr en hún kom heim og fann að hún var með bullandi hita oní kverkaskítinn sem að hún hefur verið með í 3 vikur núna nánast án pásu! Ekki líst maddömunni á það, bráðum að koma jibbí jei og íslenskir gestir að bresta á í kvöld og á morgun! Það verður eitthvað að gera og það strax og maddaman heldur að brennsi eða konni hvorutveggja að sjálfsögðu til í barskáp madömmunar muni kannski hjálpa henni í dagsformið!
over and out frá maddömunni

Skúbb

Það herjar einhver óþokkalýður hér á stúdentagarðana núna og fyrir utan innbrotin sem voru framin hér um daginn þá hafa einhverjir piltungar verið að labba um og taka í hurðarhúna og gá hvort að það sé opið og jafnvel fylgjast með hvort að fólk sé á leið í þvotthúsið. Þess vegna er maddaman að reyna að venja sig á að læsa líka þegar hún er inni í íbúðinni, en það hefur hún aldrei annars gert nema á nóttunni og þegar farið er í sturtu ! Hins vegar hefur það komið fyrir að ruðst hafi inn færeyskir drengir sem farið hafa hæðavillt á leið í partý upp á 7 hæð til Jóhanns færeyings sem að býr fyrir ofan maddömuna í sömu gerð af íbúð. Jóhann kom líka sjálfur daginn sem að öll Kaupmannahöfn var rafmagslaus í 8 klukkutíma og gómaði maddömuna við að skipta um peysu í forstofunni og var hinn versti yfir hvað maddaman væri að gera heima hjá honum og búin að færa til húsgögn og allt í íbúðinni! Jóhann sem er örmjór með afar óklæðilegt yfirvaraskegg og les guðfræði og hebresku ( gífurlegir atvinnumöguleikar í Færeyjum!!), hlýtur að breytast í eitthvert partýljón um helgar miðað við átroðninginn af þessum kunningjum. Á laugardaginn situr maddaman á skrafstólum við gest þegar hún heyrir umgang og snarast fram í forstofu. Þar stendur maður steinrunninn með viskíkryppling undir hendinni og skimar í kringum sig. Maddaman spyr hann hvað hann telji sig vera að gera og maðurinn fer alveg á límingunum við ekki blíðlegt ávarp maddömmunnar en stamar út úr sér að hann sé á leið í partý til Jóhanns. Gesturinn taldi ekki ólíklegt að manntetrið hefði þurft einhverskonar áfallahjálp eftir þessa yfirhalningu maddömunnar!
En talandi um þetta þá er danska lögreglan með mikið skúbb í innbrotsmálinu ógurlega. Nágranni maddömunnar var kallaður á þeirra fund á laugardaginn til þess að þeir gætu sýnt honum appelsínugula hettupeysu og hvort hann kannaðist við hana!!! Á þriðjudaginn ætla þeir að vera búnir að handtaka alla í appelsínugulum hettupeysum í Kaupmannahöfn og föndra myndamöppu handa honum til þess að gá hvort að hann geti fundið haus í peysuna. Þvílíkur skrípaleikur að kalla fullorðið fólk mílur vegar til þess að skoða einhverjar tuskur og boða menn svo aftur til fundar þremur dögum seinna.

Greiðasemi

Um daginn gerði maddaman greiða, en aldrei þessu vant taldi hún hann eftir sér og hafði eiginlega mesta löngun til að neita viðkomandi um greiðann, en gerði það ekki! Í dag fékk hún hins vegar þann greiða endurgoldinn allavega 10 falt. Maddaman er alin upp í greiðviknu samfélagi þar sem að menn höfðu ánægju og hag af því að gera öðrum greiða, en stundum á hún það til að gleyma sér og hugsa mest um eigin hag eins og samfélagið býður upp á!

Omygodomygod

Jæja ævintýrum maddömunnar lýkur aldrei og það er ólýsandi hvað hún ratar í! Maddaman skaust aðeins út í sjoppu áðan. Maddaman hefur verslað í sömu sjoppunni meira og minna síðan hún flutti hingað og sami maðurinn alltaf ráðið ríkjum og var þeim vel til vina! En í vetur ákvað hann að færa sig um set og í staðinn kom annar pakistani algerlega ótalandi á allar tungur en hægt að gera sig skiljanlegan með handapati. Nema hvað í kvöld kemur maddaman og ætlar að eiga við hann viðskipti og hann kemur æðandi úr bakherberginu og segir maddömunni að hún verði að koma og sjá svolítið, hann sé í svo miklu uppnámi. Maddaman er nú ekki spennt fyrir að æða með ókunnugum mönnum inn í bakherbergi en áður en hún vissi var hún komin þangað inn. Þá hafði hann gleymt að loka glugga um helgina og óboðnir gestir stolið sígarettum og slíku úr búðinni. Inn í þetta fléttaði hann brot af ævisögu sinni á óskiljanlegri ensku með dönskum hrein og vildi ólmur kynnast ævisögu maddömmunar, sagði henni af vinaleysi sínu í Danmörku og hvernig Kóraninn fúnkeraði og að það væri miklu betra að búa í Hong Kong af því að þar væri maður aldrei einn og að hann væri flínkur að búa til mat. Einnig fórum við létt í gegnum bókhald búðarinnar og stöðuna á einkareikningnum hans, ásamt því að hann sýndi mér seðlaveski sjoppunnar sem eru allavega þrjú og mun þykkri en mitt! Maddaman vissi ekki sitt rjúkandi ráð og endaði með að hún sagðist hafa lofað manninum sínum að vera fljót i ferðum! Þá vildi Pakistaninn vita hverslags nískupúka hún hefði tekið saman við, fyrst að maddaman væri ekki með hring á hendi. En það eru skýringar á öllu hér í lífinu og maddaman var svo ólánssöm að týna fína hringnum frá manninum sínum!!! Með þetta forðaði maddaman sér og það er ljóst að hún mun verða að beina viðskiptum sínum eitthvað annað í framtíðinni og setja upp hringinn góða!

Inside-outside

Maddaman hefur verið að strákast til að horfa á Innlit-Útlit þættina á netinu ef að andleysið hefur verið algert. Það er skemmst frá því að segja að maddaman er ekki hissa þó að íslendingar séu yfir á yfirdrættinum eins og maddömmusystirin orðar það svo snilldarlega. Fólk er með sérfræðinga og iðnaðarmenn í öllum sköpuðum hlutum og puntaðar konur á leðurklofstígvélum hlaupandi út um allan bæ á launum við að leita að einhverjum sérstöku hingað og þangað til að vera öðruvísi en vinahópurinn en samt eru allir á sömu leðurstígvélunum við þetta snatt og bera sama draslið úr býtum! Takið samt eftir því að þetta er bara við framkvæmdir innanhúss, svo eru menn með landslagsarkitekt á launum við að rótast í garðinum, leðurklofstígvélakonan skreppur og finnur einhverja viðurstyggilega dverga og smáhýsi sem að harmónera við "innkomuna í forstofuna" Svo er sérhannaður gosbrunnur og tjörn af þar til gerðu fólki en heimilisfaðirinn lætur sig kannski hafa það að berja saman sólpalli sjálfur ef að Visa- kortið er orðið þurrausið!
Síðan er yngsti fjölskyldumeðlimurinn með svefnráðgjafa til að hægt sé að bæla hann niður á kvöldin vegna þess að hann æsist svo í ungabarnasundinu og ungbarnatónlistartímanum og þó að hann sé í ungbarnanuddi róast hann samt ekki nóg til að sofna á kvöldin! Eldri börnin eru hjá skólasálfræðingum og ýmsum fræðingum í íþróttum og tónlist að maður tali nú ekki um skólann, foreldrarnir hjá einkaþjálfa, sjúkraþjálfara, næringarráðgjafa og hjónabandsráðgjafa, og í rannsóknum við fótaóeirð sem ku vera það heitasta núna! Enda löngu búið að greina alla með brjósklos og bakflæði og allir búnir að fá innlegg hjá Össuri. Fjölskyldan er að sjálfsögðu með endurskoðanda fyrir bókhaldið og þjónustufulltrúa í bankanum sem sér um að dreifa innkomunni passlega á viðkomandi iðnarmenn og fræðinga.
Síðast en ekki síst eru foreldrarnir sitt í hvoru lagi hjá sálfræðing til að losna við spennu sem ekki er hægt að losa um hjá hjónabandsráðgjafanum, því að þar eru báðir aðilarnir í hjónabandinu til staðar af því að það er eimitt verið að bjarga hjónabandinu!
En hagkerfið blómstrar sem aldrei fyrr...skítt með það þó að menn séu á vænum skammti af valíum til að meika daginn- enda er valíum líka hluti af hagkerfinu.

Kossar

Ef að þú ætlar að kyssa konu þá þarf tvær hendur til, annars vantar alla ástríðu í kossinn!
Þetta var spakmæli dagsins......og ráð sem að vini maddömunnar var gefið sem ungum manni!
Hann hefur þó sennilega oft verið með eitthvað dýrmætt í höndunum , því að honum hefur haldist illa á konum gegnum tíðina!

Samskipti maddömmunnar og bánkafulltrúans

Fyrst skrifaði maddaman bánkafulltrúanum!

Sæll

Vér höfum móttekið kort og hina ýmsustu leynikóða með Post Danmark!!
Kunnum vér yður hina bestu þakkir fyrir aðstoð alla í hörmungum þeim sem yfir oss hafa dunið!
Kveðjur maddaman

svo svaraði bánkafulltrúinn

Glæsilegt,

þá opna ég allt saman, þannig að allar gáttir af okkar góðu sjóðum standa yður opnir.... :)

bestu kv.

Bankafulltrúinn

Maddömunni finnst þetta afbragðs snilld og sárvorkennir þeim ógæfusömu einstaklingum sem ekki eiga jafn skemmtilegan bánkafulltrúa og maddaman!

PS. Maddaman þótti einstaklega efnilegur ruslakarl á sunnudaginn og sérstaklega góð í að bakka traktornum með ruslagámnum, allavega betri en Hjallgrim færeyingur sem að var í æfingabúðum á sama tíma og í fyrra og tók sama atriði og í Austin Power myndinni þar sem var mikið bakkað og ekkert gerðist!!!

:o)

Alltaf hleypur á snærið hjá maddömunni en hún er búin að fá nýja vinnu og er þar af leiðandi hætt hjá drengjunum sínum! Maddaman ætlar bara að vera hjá öðrum drengjum í staðinn. Staðan sem að maddömuni áskotnaðist er nokkurs konar húsvarðastaða á görðunum. Ljómandi vinna hreint að undanskildu þeim andskota að maddaman þarf að rífa sig upp á þriðja hvern sunnudag og keyra rusli á litlum auðvirðilegum traktor! Maddaman er í æfingabúðum um helgina og þarf að kaupa sér vinnuvettlinga fyrir næstu törn. Færeyingarnir vinir maddömunnar sem eru að koma henni inn í starfið eru heillaðir af Sleðbrjótskröftum maddömunnar og halda að hún yrði verðugur fulltrúi ættarinnar í sleggjukasti.
Svona smælar heimurinn nú framan í maddömuna alltaf annað slagið þó að hann hrekki hana stundum!

oggagogga

Maddaman hefur alveg gleymt að segja lesendum sínnum frá súrrealískri upplifun sem að hún varð fyrir á dögunum í matvörubúðinni. Maddaman var nefnilega í betri búðinni þangað sem að hún fer þegar fer að vanta ýmsar nýlenduvörur eins og sinnep og sólþurkaða tómata og svona.
Nema hvað að maddaman trítlar um í búðinni með sína körfu og svona og er að potast við að láta ofan hana í eitt og annað ( það er ekki eins bágt orðið ástandið hjá maddömunni og ónefndum hjónum sem að hún man eftir versla í kaupfélaginu, þar sem að konan lét vörurnar í körfuna og maðurinn raðaði þeim í hilurnar aftur því að hann var aðhaldssamur maður!!!)
Á undan maddömunni víxlast maður á óræðum aldri í flauelsbuxum með lonníettur tautandi eitthvað fyrir munni sér! Maddaman er nú ekkert að stúdera hann sérstaklega fyrst um sinn en saman flækjast maðurinn og maddaman nú þarna um rekkana. Svo þegar komið er að mjólkurkælinum er komið að því að maddömuna bráðvantar egg. Þá er Flauelsbuxi lagstur á kælinn og rýnir þarna á eggin og tuldrar alltaf eitthvað fyrir munni sér. Maddaman reynir að finna sér það til dundurs að kynnast nýjum kextegundum og eitthvað fleira að gaufa, en allt kemur fyrir ekki maðurinn liggur ótrauður á eggjunum. Maddömunni sárleiðist þetta þóf og hefur engan tíma til að bíða eftir að maðurinn ungi út 400 og eitthvað eggjum og fer nú að þoka sér í átt að kælirnum. Þá áttar maddaman sig á þessum búkhljóðum, maðurinn er að dunda sér við að gagga þarna við kælirinn og það er ekkert svona smávegis gagg, heldur bara eins og gömul ítölsk varphæna á seinna hundraðinu!! Maddaman sá í hendi sér afhverju honum hafði gengið svona seint að paufast inn búðina, það er nú ekkert smá verk að fara gegnum allt dýraríkið og gefa frá sé viðeigandi hljóð!

afmælisbarnið

Sá næstyngsti af fimm afkomendum Sumarhúsabóndans og konu hans er 17 ára í dag. Maddaman gleymir aldrei þegar hún sá þetta litla stýri í fyrsta sinn. Maddaman var búin að hlakka mikið til komu hennar og gera sér rómantískar hugmyndir um dökkhært hárprútt barn, sem jafnvel myndi skarta slaufu við hátíðleg tækifæri eins og td. skírnina!
En eins og allar óraunhæfar væntingar sem að fólk hefur í lífinu þá stóðust þær ekki. Hún var nauðasköllótt og grettin og þrútin og maddömunni fannst hún bara alls ekki nógu snotur og bar það varlega upp við maddömumóðurina hvort að hún yrði alltaf svona rauð og grettin. Maddömmumóðirin sú lífsreynda kona taldi allar líkur á því að hún myndi jafna sig! Þrátt fyrir vonbrigði fyrstu kynna urðu maddaman og hún fljótt miklir mátar! Tíminn hefur aldeilis ekki staldrað við og nú er hún orðin fullorðin og dugleg stúlka, búin með einn vetur í menntaskóla og komin í vinnu! Maddaman og Jökullinn eru hins vegar næst í röðinni að reyna að fjölga afkomendum Sumarhúsabóndans, þau sýna þó litla tilburði til þess enda seinþroska bæði tvö!!!

Ranghverfan...

Maddaman heldur að einhverfa hennar sé að ná hámarki og vonast til að það muni vindast aftur niður af henni seint og um síðir!
En að öðru, hvað er þessi indverjatittur að vilja upp á klakann, svona líka öfga metró eitthvað og hallærislegur kallgreyið, svo er hann grasbítur og ekkert hægt við hann að gera nema opna í hann rúllu! Þessi síðasta setning var í boði bænda á Héraði sem álíta það jaðra við bilun að lifa eingöngu á grænmeti!

Fótatraðkur

Maddaman situr og hlustar á frændþjóð sína Færeyinga kyrja slagara út í garði og mun sjálfsagt bresta á með fótatraðki sem að þýðir dans á færeysku hvað úr hverju. Maddaman getur þó ekki verið að agnúast út í þetta með tilliti til að að hún sjálf sat í sama garði í gærkveldi fram á nótt en var þó ekki að syngja. Maddaman fór nefnilega að spila brennó með íslensku stelpunum hér í gær og það endaði með hvítvínsdrykkju í garðinum. Maddaman þótti fórna sér óþarflega mikið í leiknum með því að henda sér niður en sannleikurinn er sá að maddaman er alltaf á nálum í boltaleikjum um að fá boltann í andlitið. Þarna voru líka skotglaðar konur en að sama skapi ekki sérstaklega markvissar. Maddaman gleymir heldur aldrei þegar jökullinn óviljandi dúndraði fótboltanum í andlitið á henni á Hálsakotsvellinum og tilfinningin þegar gleraugun voru að hamrast inn í hausinn á henni en brotnuðu þó ekki!

Litli prinsinn

Refurinn í bókinni um Litla prinsinn hvíslaði leyndarmáli að Litla prinsinum: Þú sérð ekki vel nema með hjartanu. Það mikilvægasta er hulið augunum. Maddaman er nefnilega búin að átta sig (reyndar fyrir löngu) á því að þegar lífið er að stríða fólki og það hallar upp á móti þá komi í ljós hverjir eru fágætir í kringum þig. Heimildarmenn maddömunar segja henni reyndar að skilnaðir séu ágætis mælistikur á það. Maddaman skal ekki um það segja fyrr en á hefur reynt!

Jómfrúarbloggið.....

Fyrsta bloggið á nýju tölvu á maddömunnar! Maddaman ætlar að þreyta lesendur sínar með að útmála hverslags bras þetta hefur verið og gefur ykkur örlítið tóndæmi.
Mánudagur, maddaman fer í búð í nágrenninu í fyrradag og ætlar að kaupa tölvuna. Talvan ekki til. Kemur sennilega á miðvikudaginn, maddaman búin að læra af samskiptum sínum við þessa þjóð að þá kemur talvan örugglega ekki fyrr en í næstu viku ef ekki bara aldrei! Maddömu ráðlagt að beina viðskiptum sínum annað. Maddama fer í gær á annan stað eftir að hafa símað og kynnt sér að gripurinn sé til þar og spurt hvort móttekið sé Visa-kort, mikil gleði brýst út hjá madömunni, það er gleði sem að víst mátti spara sér. Þegar komið er á staðinn getur búðin ekki móttekið þar til gert alþjóðlegt Visa kort af því að þar er ekki til posi!!!! Benda maddömunni á að beina viðskiptum sínum annað! Dagur 3 hjá Skrámi og maddömunni hefði eiginlega átt að byrja með viskí af fenginni reynslu. Maddaman kynnir sér hvort að umrædd talva sé komin á stað númer eitt, af því í dag er miðvikudagur. Talva ekki komin og kemur kannski á föstudaginn! Maddömu boðið að kaupa sýningareintak á fullu verði sem að allir rónar bæjarins eru búnir að þukla og hnerra yfir. Maddaman afþakkar það hljóðlega! Þá er þriðji staðurinn þefaður uppi og þar leynist eitt eintak og þar eru til posar og allar hugsanlegar leifar tæknibyltingarinnar leynast í bakherberginu! Maddaman mætir galvösk með kortið og passann og fjölskyldualbúmið nánast til að gera grein fyrir sér. Upphefjast nú þvílíkar hringingar að maddaman telur að það hefði jafnvel verið auðveldara að ná samband við geimskip en við danska visakortfyrirtækið. Pilturinn kemur úr símanum og tilkynnir maddömunni að það sé ekki heimild fyrir þessu bruðli og hún verði að biðja bankann um að liðka til fyrir því. Maddaman gerir það og bankinn setur heimildina í nánast óendanlegt til að liðka fyrir þessu.
Aftur fer maddaman til piltsins og enn afþakkar danska þjóðin þessar íslensku spírur. Pilturinn léttir ekki lund maddömunnar með því að tjá henni að það hafi alltaf verið nóg heimild á kortinu, það sé eitthvað annað að. Það er nefnilega það. Maddaman vill fá að vita hvað það er en það er ekki hægt því að dönsk þjónustulund finnst ekki!!! Maddaman heyrir þá í skólabróðurlandsbankafulltrúanum í 3 skipti þennan daginn og hann lætur vekja forstjóra Visa Island til að létta á einhverjum varnarmálasáttmála við Danmörku! Forstjórinn gerir það með fullan munnin af smoothie og öðru heilsufæði og enn fer maddaman á stúfana í búðinni.
Allt er þegar þrennt er og nú er ekki hægt að komast undan þessum viðskiptum við maddömuna. Hún neitar hins vegar að kaupa af þeim ýmsan óþarfa sem að þeir telji að hún hafi þörf fyrir eins og þráðlausar mýs og töskur og ýmislegt dót!! Maddaman telur þetta vera mjög lýsandi um hvernig það er að eiga viðskipti við dönsku þjóðina. En hvað um það talvan er komin í hús þannig að nú er hægt að bretta upp ermarnar!!!

Frumbyggjar

Maddaman ætlaði eiginlega ekki að blogga fyrr en nýja talvan væri komin í hús. En þrátt fyrir að madddaman hefði mikil útispjót í dag þá tókst það ekki! Maddaman er óskaplega þreytt á að leika Pollýönnu um þessar mundir og óskar sér að vera horfin til frumbyggja sem ekki eru plagaðir af vestrænum lifnaðarháttum og gerfiþörfum hverskonar. Maddaman gæti hugsað sér að gegna einhverri virðingarstöðu hjá ættbálknum til dæmis að vera með veðurhorfurnar á hreinu eða eitthvað! Þetta er þó sennilega staða sem ekki er hægt að sækja um frekar en að verða páfi. Maddaman vonar bara að það verði netsamband hjá ættbálknum......

Norður og niður....

Ein helsta skemmtun maddömunnar í útlegðinni er að horfa á Út og Suður á netinu, þar sem kunnugleg andlit hafa verið á ferðinni undanfarið. Maddömuna óaði þó ekki fyrir því að það væri lykilnn að blómlegum fyrirtækjarekstri að hafa framliðna við störf eins og kom fram í síðasta þætti!

Kardemommubærinn

Maddaman telur sig vera búin að syrgja innbrotið í Kardemommubæinn nóg (eins gott að þjófarnir voru ekki á höttunum eftir Soffíu frænku sjálfri!!) Í samvinnu við banka allra landsmanna og skólabróðurbankafulltrúans (sem að maddaman talaði svo lengi við í síma um jólin að kona Sumarhúsabóndans hélt að maddaman væri að tala við einhverja vinkonu sína!) stendur til að fjárfesta í nýrri tölvu í vikunni! Neyðarplönin voru þau að maddaman tæki að sér að esskorta ljúfa bissnessmenn einu sinni í viku fram undir sláturtíð en þetta bjargaðist. Önnur fjáröflunarleið er sú að sarga á harmonikku fyrir framan verslunarmiðstöðina en miðað við útganginn á viðkomandi einstaklingum telur maddaman að hún muni einungis geta safnað sér fyrir vasareikni!
Þá fara nú hjólin að snúast á nýjan leik í lífi maddömunnar og leikritið getur haldið áfram. Maddömuna langar hins vegar til að biðja lesendur sína um að hafa augun opin ef að þeir vita af ljúfu ljóni sem langar að flytja til Köben og gæta 28 fermetra íbúðar og einnig væri gott ef ljónið gæti gripið í létt heimilisstörf!
Að lokum vill maddaman bjóða maddömmusysturina sem er ein sinna tegundar eins og þar stedur velkomna í hóp lesenda. Það hlaut að draga til tíðinda með þessi góðu rannnsóknargen!!!

Ófarir madömunnar

Maddaman segir sínar farir ekki sléttar! Á hátíðinni hans Jesús um helgina var brotist inn hjá maddömunni og kærustu eigum hennar stolið svo sem báðum fartölvunum bæði þessari nýju og þeirri gömlu, peningaveskinu, Ipodinum, lyklum að íbúðinni og peningum. Þetta gerðist um hábjartan daginn meðan húsið var fullt af fólki og enginn heyrði svo mkið sem jarm. Maddaman hafði brugðið sér frá í einn og hálfan tíma til að læra! Það sem er verst af öllu er að hluti af lokaritgerð maddömunnar og ýmislegt skóladót er inni á fartölvunni. Það er því grámórautt skapið í maddömunni um þessar mundir og lái henni það enginn!!

Kviss

Það er útilokað að maddaman fari að semja kviss um sig, til að lesendur hennar geti keppt í því hver þekkir hana best. Ástæðan er einföld maddama hefur framkvæmt svo marga lygilega hluti um ævina að þeir sem að þekkja hana best myndu ekki einu sinni trúa því og kolfalla þar af leiðandi!!!

Útburður...

Þá er síðasti útburðurinn í bili búinn og búið að skúra sig út úr dyrum. Vinkonur maddömunnar flúnar á ný mið, önnur til Íslands fyrir rúmri viku þar sem hlutirnir gerast greinilega en hún er búin að fá sér vinnu og bíl og íbúð svo lítið eitt sé upp talið!
Hin vinkonan flutt upp í afdali með danska manninn, gamla barnið og nýja barnið sem er alveg að fara að fæðast! Það er ekki laust við að maddaman verði pínulítið angurvær yfir vinkonumissinum og einnig vegna þess að óneitanlega fer að styttast í það að maddaman þurfi sjálf að fara að skúra sig út. Maddaman er voðalega hrædd um að hún muni fella tár ekki af því að það verði erfitt að flytja, heldur vegna þess að vissum kafla í lífinu mun ljúka. En það borgar sig ekki að taka út sorgirnar fyrirfram!
Það barst til tals áðan að það er einkennilegt hvað menn eru lítið spenntir fyrir því að hjálpa öðrum að flytja og allir eru mjög uppteknir þá af ýmsustu verkum. Maddaman er búin að standa í miklum flutningum um dagana bæði fyrir sjálfan sig og aðra. En þegar hún fer að hugsa til baka þá hefur hún oftast verið ein, síðast þegar hún flutti fékk hún hjálp með rúmið og sófann sem að var það eina sem að hún gat ekki sett á herðarnar! En það er líka fínt að vera sjálfum sér nógur.
En maddaman hefur engar áhyggjur af því að hún þurfi að flytja ein næst, því að Brennu-Böðvar er búin að bjóða fram aðstoð sína og vinkonurnar tilvonandi eiginmenn sína!!!! Miðað við undirtektirnar á síðasta bloggi telur maddaman ólíklegt að eiginmaður hennar verði með í flutningunum!!!!

;o)

Maddaman hefur engin hjúskapartilboð móttekið enn og engin aðdáendabréf! Þó er komin vilji frá einni góðri vinkonu að skaffa einhverja kandídata, en maddömuna grunar að þeir séu ekki Skagfirskir og eigi jafnvel ítök í mafíunni sem að getur nú sossum komið sér vel !

Makablogg....

Maddaman sér að menn er með öll spjót úti í makaleitinni og meðal annars að nota bloggið til að koma frá sér tilfinningum sínum, leita ráða í ástamálum og slíkt!
Ekki vildi þó betur til en að aðilinn sem verið var að lýsa velþóknun sinni á blogginu en jafnframt brigsla um framtaksleysi í samskiptum hafði samband við viðkomandi bloggara og frábað sér umtal á bloggsíðunni.
Maddaman var ekki búin að átta sig á að hér væri staðurinn til að auglýsa eftir lítið notuðum, kassavönum, drykkfelldum skemmtilegum hestamanni, gjarnan Skagfirðing og mætti eiga örlítinn kvóta, sama af hvaða dýrategund!!! Þetta finnst maddömunni ekki miklar kröfur og skorar á lesendur síðunnar að beina öllum svona mönnum á síðu maddömunnar og þá geta lesendur fylgst með þessu ferli í beinni og engir óþarfa milliliðir!!!

Rit

Maddaman á sér draum eins og svo margir sem betur fer.
Sá draumur er að koma einhverju frá sér á prenti einhverntímann sem að kengur væri í eins og Jökullinn mundi orða það!
Þess vegna er maddaman alltaf að "niðurhala" efni og verður misjafnlega ágengt en stundum rekur á fjörur hennar fólk sem að eys úr brunni sínum gott betur en hálfu lífshlaupinu og jafnvel hlaupum margra annara íslendinga! Verst af öllu er að maddömunni finnst að það sé búið að skrifa allt sem þarf að skrifa og kannski lítið nýtt koma fram á sjónarsviðið. En maddaman á líka eftir að ná upp 5 ára svelti á íslenskum bókmenntum og þetta sem að hún nær að lesa á hlaupum í Árnastofnun og fyrir háttinn á Íslandi er náttlega ekki upp í nös á ketti.
Las samt lungann úr ævisögu danska forsætisráðherrans í bókabúðinni í tveimur áhlaupum, vinahópnum til mikilar undrunar og uppástendur hann að það sé ekki hægt að lesa bækur standandi í búðum!
En ritdraumurinn mun vonandi rætast á næsta ári.....þrátt fyrir að erfitt verði sennilega að krydda meistararitgerðina með sögum úr mannlífinu!!!

Sleðbrjótskraftar

Maddaman er í óvenju miklu bloggskapi og leiðari dagsins kemur til að við þrif snéri maddaman sundur skaft nokkurt sem að á endar á sköfu sem að staðsett er á baðherbergi maddömunnar. Þessi skafa er ætluð til að ýta vatni af gólfinu í áttina að niðurfallinu en þetta léttir umgang á þessu kamersi til muna. Maddaman hefur ekki tölu á því hversu mörg svona sköft hún er búin snúa sundur síðan hún hóf búsetju á flatneskjulandi þessu.
Þessir kraftar maddömunnar hafa fylgt henni alla ævi og var hún ung að árum þegar hún rogaðist inn með mjólkurgrindurnar af tröppunum býsna roggin með sig.
Hins vegar voru engin fagnaðarlæti hjá Sumarhúsabóndanum og frú þegar sama dama þá 7 ára sneri sundur bíllykilinn á bifreið sömu hjóna, í einu af fáum sumarfríum fjölskyldunnar á Akureyri. Fyrir einhverja slembilukku var þó varalykill staddur í hanskahólfinu og fékk maddaman ofanígjöf og vinsamleg tilmæli um að halda krumlunum frá lykli þessum.
Nú svo var maddaman liðtæk í böggum rigningarsumarið mikla og síðast en ekki síst góð í því að lyfta nýbornum rollum yfir milligerðin í fjárhúsunum, Sumarhúsabóndanum til skelfingar. Einu sinni brá hann sér nefnilega í kaupstað og maddaman var heima hjá rollunum og svo bar ein bústin tvævetlan á meðan og eina leiðin til að koma henni vel fyrir til bráðabirgða var að lyfta henni yfir. Svo kom Sumarhúsabóndinn heim og fór að athuga aðstæður og spurði maddömuna hvernig tvævetlan hefði eiginlega komist yfir milligerðina. Þegar maddaman sagðist hafa lyft henni yfir, þá glotti Sumarhúsabóndinn aðeins og sagði;Nú ætli mig muni þá nokkuð um að lyfta henni til baka!

allt í drasli....

Maddaman horfði á þátt í vetur sem að er sýndur á Sýn og heitir Allt í drasli, þetta var fyrsti þátturinn sem var sýndur. Maddaman horfði svo með öðru auganu á þætti sem eru á netinu áðan! Maddaman ætlar ekkert að fjölyrða um draslið í þessum húsum en á öllum stöðunum 4 sem að maddaman hefur séð hafa verið húsdýr. Á þremur stöðum var köttur og á einum stað hundur. Maddaman hefur líka tekið eftir því að það virðist ekki fara vel saman að eiga svo 3 stk börn, þá virðist mönnum verða það ofviða að henda nokkrum sköpuðum hlut eða bara vaska upp! Merkilegt að hvorugt er á óskalista maddömunnar að eiga kött eða bara húsdýr og þaðan af síður mörg börn!!!! Hlýtur að benda til að það verði snyrtilegt á heimili hennar!

Sumarið komið...

Það er 20 stiga hiti hjá maddömunni í dag og ömmubróðir hennar heitinn hefði bætt á sig ullarpeysu ef að hann hefði verið að slá. En það var hans siður að klæða af sér hitann og sást oft við slátt með orf og ljá í þykkum ullarpeysum. En hann slær ekki meira hérna megin og óvíst hvað hann er að fást við hjá honum Gvuði!
Maddaman er annars að sækja í sig veðrið við lesturinn rétt eins og vant er þegar "kvikasilfrið mælinn tryllir" reyndar í öfuga átt við það sem Stuðmenn sungu um!

Dagur verkamanna.......

Dagur verkalýðs hefur sannarlega verið haldinn hátíðlegur hérna á Eyrarsundssgarði.
Fyrst fór maddaman ásamt Hróarskeldubændunum á safn hérna í nágrenninu sem að heitir Litla-Myllan og er gömul mylla eins og nafnið gefur til kynna, sem að var upphaflega malað korn í en var innréttuð sem íbúðarhúsnæði um 1920 og það ekkert smá húsnæði! Húsmóðirin bjó þarna fram undir 1972 en þá fór hún á elliheimili og það er bara eins og hún hafi skroppið út í göngutúr, inniskórnir og sloppurinn í forstofunnni. Þetta var afskaplega gaman! Maddaman sér í hendi sér að maddömumóðirin mundi hafa gaman af slíkri kynningu.
Nú síðan var haldið heim og snædd súkkulaðikaka sem að maddaman bakaði i tilefni dagsins og svo kíkti stórfjölskyldan ofan úr Herlev við í kaffi þannig að þetta var allt hið besta mál.
Maddaman er hins vegar alveg afvelta eftir þetta súkkulaðikökuát og hyggst reyna að taka hraustlega á því í bikkinu á morgun:o) Batnandi mönnum er best að lifa.......

Danmörk.....

Þú Danmörk, mín draumljufa pandekage
með drykkfellda þjóð som æder svin!
Hafmeyjan smáa fékk hausinn tilbage;
hugstætt er jafnan det danske grín

þessi vísa er úr bókinni Meiri Gauragangur eftir Ólaf Hauk Símonarson, þetta er hvað bestu unglingabækur sem að skrifaðar hafa verið á íslenska tungu að mati maddömunnar.
En ástæðan fyrir því að maddömunni datt þetta í hug er sú að maddaman brá sér í lágvöruverslunina áðan, eins og oft áður að versla nýlenduvörur.
Maddaman verslar mikið í þessari búð sökum verðlags sem er lágt en það þýðir líka að það er ekki mikið vöruúrval. Maddömuni þykir það þó kostur vegna þess að freistingunum fækkar mikið við að varan sé ekki til eða takmarkað úrval af henni. Enda fékk maddaman áfall þegar hún fór í Hagkaup í Kringlunni með vinkonu sinni í vetur og sá allan óþarfann sem þar er á boðstólum. Maddömunni finnst ekki skrýtið að verð á matvöru á Fróninu sé í hærri kantinum, það er gjörsamlega allt til þarna. Það er aukinheldur verið að transporta með danskar flödebollur í gámum til Íslands!!!
Maddömunni finnst alveg makalaust að það sé til innflutt kex í einum 3 rekkum meðan að íslenska þjóðin slær örugglega met, kannski þó næst á eftir Bandaríkjamönnum í kex og kaffibrauðsframleiðslu!
En þetta var gríðarlegur útidúr frá vísunni en hangir samt allt á sömu spýtunni!
Maddaman verslaði meðal annars pakka af morgunkorni, sem er nokkuð sem að maddaman kaupir ekki oft, bæði vegna þess að hann er frekar dýr og þetta er morgunkorn sem er aðeins sætt, minnir á hunangsseríos en þó ekki jafn sætt. Síðan paufast maddaman út með föggur sínar til að láta í körfuna á hjólinu, þá er búið að leggja öðru hjóli fyrir framan maddömufákinn og einhver súla þarna á óheppilegum stað.
Maddaman missir þá alla stjórn á morgunkornspakkanum sem að var lausbeislaður og hann fellur á stéttina. Þá ber að hjálpsaman róna með hornös sem að treðst að þarna, til að aðstoða maddömuna með morgunkornið þrátt fyrir viljayfirlýsingar af hennar hálfu að hún réði við þessar aðstæður sjálf. Svo styður róninn við hjólið meðan maddaman beygir sig eftir pakkanum og þá kom að þjóðaríþrótt dananna; afskiptasemi og níska! "Nú hvað þú ert bara með dýra vöru þarna, segir róninn! Á ÉG að segja ÞÉR hvað er langhollasta og ódýrasta morgunkornið segir hornasaróninn í fræðandi tón. Já já segir maddaman, mér er nú vel kunnugt um að það eru hafragrjón. "Eimitt eimitt" sagði róninn ægilega hamingjusamur yfir því að vera svona góður í hagfræði og heilsufræði.
Það er þetta sem að maddaman þolir ekki við þessa annars ágætu þjóð. Þolir ekki þessa afskipasemi, ef að þú ætlar að gera einhverjum greiða þá gerir þú það án þess að prédika eða skipta sér af hvað viðkomandi er að versla. Maddaman hefur ekki tölu á því hvað hún hefur oft upplifað svona aðstæður hér. Fyrsta skipti þegar maddaman eftir að hafa verið heilt sumar í því að stumra yfir dönskum vanþakklátum gamalmennum fór og keypti sér rúm og skrifborðsstól í Rúmfatalagernum! Þá er einhver gamla hækjan þar og sér þegar maddaman tekur upp 500 kalla búntið til að borga og þá segir gamla í alskrækasta "allirhafaþaðsvogottnemaég" tóninum sínum "ja ég sé að unga fólkið nú á dögum hefur nóg á milli handanna"
Maddaman snéri sér við og sagði með sínu blíðasta brosið "já veistu og ég vann meira að segja fyrir hverri einustu krónu sjálf og ráðstafa þeim þess vegna að eigin geðþótta!
Samræður okkar urðu ekki lengri.

Sólskins og skúrir

Þegar hlegið er á einum stað er grátið á öðrum en eins og góðvinur maddömunar segir það kemur alltaf sólskin á eftir rigningunni en það getur rignt lengi.

Gleðilegt sumar.

Gleðilegt sumar og hafið þökk fyrir veturinn!
Í dag er stóri bænadagur en Danir eru eina landið í heiminum sem að taka sér aukadag í það að rækta trú sína og er sá dagur hugsaðir að þá allir trúflokkar kost á því, án þess að vera kenndur við einhvern einstakan trúarhóp. Þessi dagur er búið að vera við lýði síðan 1686 og er alltaf 4 föstudag eftir páska.
Í tilefni sumardagsins fyrsta var farið í grill út á Vesturbrú hjá vinafólki og var það hin besta skemmtun. Seinna um kvöldið slógust norskir vinir gestgjafans í hópinn sem ekki væri í frásögur færandi nema af því að einn af þeim heitir Fróði Kommóða. Það þótti maddömunni frekar sérstakt en Fróði skýrði glaður og reifur frá því að vinir hans kölluðu hann alltaf Frode kommode fuld med hindbær i hovedet!!! Útleggst á því ylhýra Fróði kommóða með fullt höfuð af hindberjum, þetta er vonandi fyndnara á norsku!!! Nema hvað að kommóðu viðhengið er til komið af því að maðurinn vinnur við húsgagnasmíði! Svo að hann bara lét bæta kommóðunni inn í sem millinafni!!! Maddaman gat þá ekki á setið á sér og spurði hvort að það hefði ekki verið pláss fyrir "fuld med hindbær í hoved" á ökuskirteininu!!! En Fróði fór ekki fram á það.
Við gerðum svo bæn okkar í býtið áður en haldið var heím á leið til þess að þurfa ekki að rífa okkur upp í messu snemma í morgun!

Píus páfi

Maddaman telur ólíkegt að hennar hafi verið saknað úr bloggheimum fyrst að engin eru kommentin á 1. apríl. Maddaman hefur verið upptekin að plögga fyrir páfakjörið en maddaman er sérleg áhugamanneskja um þá athöfn enda komin af ofsatrúarmönnum!
Maddaman hefði lika getað hugsað sér að verða prestur og sækja um Hofsprestakall en maddaman lætur aðra um það í bili. Vorið er að kynna sig hérna á daginn en lætur lítið yfir sér annars.

hihi

Haha maddaman tók eitt netpróf áðan að gamni sínu
http://www.chilinet.dk/default.asp?id=411&qid=15 og kom það í ljós að hún væri semi slut og hefði sofið hjá stórum hluta vinahópsins!!! Alltaf gaman að því. Maddaman man reyndar bara eftir elfunni en maddaman og hún sváfu mikið saman um helgar hérna vetrarpart í Kaupmannahöfn. Elfan upp við vegginn og maddaman fyrir framan, maddaman hefur aldrei sofið hjá nokkurri manneskju sem að lá eins og lík alla nóttina með spenntar greipar utan um sálmabókina! Maddaman var alltaf skíthrædd um það að morgni, að nú væri bara komið að því að panta fyrir hana í glugglaust!
Annars eru gömlu kallarnir komnir út á sportbílunum og það er alltaf merki þess að það sé komið vor madömunni til mikillar ánægju.

Glaðir dagar

Eins og Þórbergur Þórðarson vinur maddömunnar og einn af þeim sem að hún hefði getað hugsað sér að hitta persónulega í lifandi lífi skrifaði svo snilldarlega:Þá eru sumir dagar svo góðir við mann að þeir spásséra með manni ævilangt. Svoleiðis finnst maddömunni að dagurinn hennar hafi verið. Ef að ég man rétt þá var það dagurinn þegar sjottan komst í þjóðsögustofuna hjá Þórbergi í sögunni um Lillu Heggu!

Hjartanlega.....

Maddaman var aldrei þessu vant viðlátin á fréttatímanum og horfði á ýmislegt sem fyrir bar í honum. Meðal annars um blinda sem að voru á handverksnámskeiði og er ekkert nema gott um að það að segja. Nema að maddömunni finnst ekki traustvekjandi að blindir séu mikið að föndra með vélsögum......enda tók fréttamaðurinn sérstaklega fram að enginn þáttakandanna hefði slasast á námskeiðinu.... en maddaman sér með skelfingu fyrir sér blóðsúthellingar þegar þáttakendurnir skella sér út í jólagjafaframleiðsluna heima í stofu!!
Sparnaðarráð dagsins er allavega ekki að kaupa hjartarhakk á tilboði í búðinni....maddömunni fannst á lyktinni sem að elgurinn væri kominn með hornum og öllu tilheyrandi heim í stofu í fengitímafíling! Bragðið var eftir því...

Skattmann

Jæja páskaegg maddömunnar er á hraðferð um holræsin en á hana herjuðu uppköst í tilefni páskanna. Aumingja maddaman hélt að hún væri að andast í þessu ferli sem að uphófst þegar verið var að gera skattaskýrsluna, en systir var á línunni með faglega ráðgjöf um skattamál. Maddaman pantar að kasta ekki upp á komandi meðgöngum! Sæðisgjafinn þó ekki fundinn.....

Lange Fredag

Maddaman er orðin hálf þreytt á Hugh Grant sem að virðist vera fluttur inn í danska sjónvarpið á stórhátíðum í væmnum "stelpu og fjölskyldumyndum" sem eru mjög fjarri raunveruleikanum og er alls ekki nógu "ruddaleg týpa" fyrir maddömuna.
Hins vegar brá maddaman sér í göngutúr um Kristjánshöfn í dag í góðviðrinu eins og allflestir á eyjunni Amager og var það hið besta spásseri. Maddaman tekur stundum félaga Ipod með sér en ekki þegar hún þarf að viða að sér efni um náungann. Ein af piparjónkupassjónum maddömmunnar í þessu lífi fyrir utan það að safna postulíni er að stúdera fólk og þá er Kaupmannahöfn nú aldeilis staðurinn. Hér er svo mikið af mismunandi fólki sem betur fer. Í dag sá maddaman td. manninn sem að sat á næsta borði við hana á kaffihúsi fyrr í vikunni ásamt móður sinni sem að einnig var með í för. Maðurinn með apanna á lírukassanum í rauðu dressi með stóra gyllta hnappa var einnig á vappi með félaga sínum. Hamingjusömu pörin sem vappa um með afurðir sínar í vögnum og kerrum. Líka óhamingjusömu pörin sem pexa og strunsa svo á undan hvort öðru í mótmælaskyni við rangar replikkur í leikþættinum. Svo var það konan í tiger pilsinumeð kaupstaðarlyktina sem að slagaði út af búllu í Kristjánshöfn og söng hástöfum fyrir maddömuna og tvo myndarlega stráka sem að teymdu hjól og spjölluðu um djammið í gær.
Svo voru miðaldra hjón með hálfvaxna unglinga sem að smsuðu félögunum stanslaust um hvað þetta væri glatað að vera á þessu rölti með gamla fólkinu. Svo eru það einfararnir og að sjálfsögðu maddaman kerlingartetrið!

Grafarþögn....

Maddaman hefur haft það ákaflega rólegt í dag. Þykist vera að læra en veit betur innst inni.....!
Kona sumarhúsabóndans hringdi í bítið og lá það helst á hjarta hvort að maddaman ætlaði að fara og ná í Fischer kallinn á völlinn. Maddaman reiknar með að Sæmundur verði á vellinum keikur á kantinum (eins og maddaman lærði af únglingunum á Íslandinu) í einhverju hlébarðadressinu!
Hins vegar er það alveg merkilegt með maddömuna að hún er hálf óróleg yfir þögninni í húsinu og minnti það maddömunna á hobbita nokkurn af Héraðinu sem að bjó með aldraðri móður sinni! Gamla konan var afskaplega málgefin og svolítið svona tuðin (þetta nýyrði heyrði maddaman líka um daginn og þótti sérstakt) Síðan fór móðirin eitthvað af bæ og sonurinn varð eftir heima. Hann bar sig svo upp við granna sinn og sagði honum að hann vissi svei mér þá ekki hvort hann væri þreyttari á tuðinu í mömmu sinni þegar hún væri heima eða þessari grafarþögn sem að ríkti þegar hún væri að heiman!
Svona fer maddömunni eins, hún veit ekki hvort hún er þreyttari þegar þögn ríkir á ganginum og hún veit að börnin hamast á herðablöðum foreldra sinna í þröngum íbúðunum, eða þá þegar allar dyr standa upp á gátt og börnin skakast um á ýmsum samgöngutækjum gólandi og hvíandi!
Fyrst að maddaman er farin að tala um málfar og nýja notkun á ýmsum orðasamböndum og orðum, þá má hún til með að segja lesendum sínum frá því að í Rvk. dvölinni um daginn fór maddaman og fékk sér innlegg hjá Össuri. Það var löngu vitað að blessuð maddaman þyrfti á þessu að halda og hitti hún þar fyrir viðkunnalegan pilt á sínum aldri sem að skoðaði á henni býfurnar af mikilli kunnáttu. Fyrir utan það að annar fóturinn er töluvert styttri á maddömunni kom svo sem ekkert nýstárlegt í ljós við ganglimi maddömunnar. Það var bara að reyna að gera þessi innlegg svoleiðis að þau væru "notendavæn" fyrir alla háhæluðu skó maddömunnar!!!!Pilturinn talaði hins vegar mikið um að "setja undir þig innlegg" "og setja undir maddömunna hitt og þetta" Það þótti maddömunni ákaflega sérstakt orðalag og dulítið fyndið. Minnti meira á þegar verið er að setja ný dekk undir bíl.