På randen af fornuft

Baðkarsskriflið er alveg að bresta til Betlehemborgar, þota Flugleiða er að fylla á eldsneyti og smákökur og búa sig á stað frá flugstöð Leifs heitins Eiríksonar (sem by the way þótti öruggara að fara sjóleiðina) til þess að sækja maddömuna meðal annars. Og hvað er maddaman að gera...situr hún afslöppuð í casual suit eins og í auglýsingum Ielandair að supla hvítvín og hringja yfiveguð símtöl í bankann til að láta færa árshagnaðinn á milli gullbóka útaf skattaafslætti! Oseiseinei maddaman er barasta að færa jólagjafirnar á milli taskna, þrífa ískápinn leita að jólakjólnum í fataskápnum og glósunum í sama skáp.....allt í sömu andránni! En örvæntið ekki, maddaman hefur erft tækni Sumarhúsabóndans í svona aðstæðum og hver er hún...jú að setjast niður og blogga!!!!
Þakka ykkur góðar kveðjur...sérstaklega þeim sem ekki þorðu að koma fram undir eigin nafni!!!

"þaðéldénú"

Engar spurnir hefur maddaman haft af fótabúnaðinum og hefur hún þó starað fráum össuaugum sínum (hehe mínus óendanlegt á báðum augum plús sjónskekkja af verstu gerð!!!) á alla fætur sem fyrir hana hafa borið í dag, og þó sérstaklega verið að leita að græntíglóttu hnésokkunum!!!
Keyptir í kauffélaginu okkar íslendinganna Magasín!
Annars er maddaman að vinna í ýmsum "smá"verkefnum áður en stélinu verður létt á loft. Gott verður að komast á óðal Sumarhúsabóndans og konu hans, þar sem aðal jólahasarinn er í fjárhúsunum en ekki búðum um þessar mundir!!!!
Verður þetta því jólablogg maddömunar sem að hefur kvatt danska kunningja og vini í dag. Og var meðal annars beðin fyrir kveðju til Örnen. Maddaman vill bara koma því á framfæri hér með, hefur enga prívat kontakta við hann!!!
Annars hafið það eins og ykkur sýnist um hátíðarnar...það ætlar maddaman allavega að gera!
Hittumst í bloggheimum á nýju ári en vonandi life um jólin!

Berrössuð á tánum....

Maddömutetrinu er nú allri lokið. Maddaman þvoði af sér helstu spjarir í dag og meðal annars nánast alla sokkana sína sem eru þeim ágætu kostir búnir að vera allir svartir og er þessvegna hægt að púsla saman eftir þörfum ef að þvottavélin étur einhvað af þeim.
Maddaman setti þá síðan í þurkarann og ætlaði svo að sækja þá glöð og reif.....en viti menn það var einhver búin að hirða ca 20 pör af sokkum af maddömunni sem að stendur uppi með eitt par af tátillum og eina lopasokka á heimili sínu!!! Sem betur fer er opið í búð í dag svo að maddaman getur skotist og keypt sér nokkur pör til reddingar!
Maddaman óskar sér því að fá nokkur sokkapör í jólagjöf...ef að einhver væri að vandræðast með það!!! Eins veltir maddaman fyrir sér svona í framhjáhlaupi....er einhver að lesa bloggið hennar...er einhver þarna úti?

Annir

Maddaman hefur haft mikið við að fást undanfarið svo sem vinnu og skóla og félagslíf! En í gær sat maddaman lokafyrirlesturinn í háskólanum reiknar hún með! Það var fortíðarljómablandið (snilldar þýðing hjá Pétri mínum Gunnars á þvi ágæta orði nostalgígju ) en ágætt. Það er engum hollt að staðna í sama farinu. Maddaman skrapp síðan í þriðja jólahlaðborðið í gær með strákunum að sjálfsögðu eða gömlu vinnufélögunum, sýndi afburða takta í keilu....allavega eftir nokkur æfingarskot og er pínulítið rykug í kollinum í dag!!

Ondúleringar með meiru...

Maddaman var í ondúleringum í dag enda eins gott, því að maddaman frétti í ondúleringunni að Bubbi væri á lausu....maddaman er svona að pæla í hvort að laginu "Brynja ég elska þig" verði kannski breytt í kjölfarið!!!
Þar sem maddaman er farin að reka áróður fyrir jólagjöfum á annað borð þá finnst henni nýi diskurinn með "Á móti sól" mjög skemmtilegur en þar eru tekin 12 gömul og góð íslensk lög og útsett á ný! Maddaman er búin að heyra ein 4 og finnst skemmtilegt og ekki spillir fyrir að söngvarinn hann Magni er náfrændi og skólabróðir maddömunnar frá fornri tíð! Maddaman húxar að hún "styrki strákana" eins og góðvinkona maddömunar segir svo gjarnan og kaupi diskinn á Fróninu. Verður það þá geisladiskur númer 3 sem keyptur hefur verið á árinu og kallast það víst gott diskaár hjá maddömunni!!!

Gamlar konur og ný stígvél......

Maddaman var hjá drengjunum sínum í dag í næst síðasta skipti fyrir jól. Þeir voru minna strekktir en síðast og létu alveg eins og vitleysingar við maddömuna sem að glottir í laumi. Maddaman þarf oft að hlaupa á milli búðanna sem eru sitt í hvoru húsnæðinu og gangbraut sem aðskilur þær. Maddaman stóð og beið eftir grænu ljósi ásamt örugglega 84 gamalli konu, álíka hressileg og páfinn, gamla var soldið að sópa Kristjánshöfn með hárinu þarna í 60 den sokkabuxum og á háu hælunum, að búrast með tvo kaffipakka undir hendinni (sem að pottþétt hafa verið á tilboði!!! ).
Nema hvað að gömlu verður mjög starsýnt á fótabúnað maddömunnar, sem að í þessu tilfelli voru brún stígvél þó ekki kennd við gúmmí. Nema gamla kommentaði á það hvað stígvélin væru flott og er madamman hér með búin að leggja trendið fyrir jólagjafir til ömmu lesanda!!! Camper stígvél rúla.....!

Hvad for noget......

Maddaman álítur að henni sé farið að förlast miðað við stafsetningarvillurnar og óvandaða framsetningu í gærdagsblogginu sem ofan í kaupið birtist tvisvar!!
Maddaman hefur verið að skaka í skólabókum sínum í allan dag og seinniparts að moka flórinn í híbýlum sínum sem er mjög þarft um þessar mundir! En eigi svo skemmtilegt! Þó er maddaman ekki búin að finna úrið sitt sem að leikur grunur á að sé grafið í haugum kenndum við rusl!
Maddaman tjúnaði jólalögin og Robbie Williams sem maddaman splæsti í að kaupa um helgina (maddaman er örlítð veik fyrir honum!!) og þá gekk moksturinn þokkalega!
Maddaman rifjaði í dag upp skemmtilega sögu af fyrsta og eina bónorði maddömunnar( maddaman telur ekki með þá sem hafa beðið hana að giftast sér í ölæði!!)
Um jólin þegar maddaman var 16 ára vann maddaman í jólafríinu og sparaði þannig fyrir bílprófinu, alltaf mikil búkona maddaman. Maddaman vann á sjúkradeild þar sem mest var gamalt fólk í langtímavistun. Þar var gamall maður, nærsveitungi maddömunnar sem aldrei verið við kvenmann kenndan og var hann gríðarlegur heillaður af maddömunni. Sérstaklega af því að "þú ert svo stór og falleg kona væna mín, heldurðu að við ættum ekki bara að gifta okkur góðan, ég er viss um að við gætum búið góðu búi". Karlinn var nefnilega tyrðill sjálfur og hefur haldið að þessi genasplæsing yrði góð! En maddaman afþakkaði í von um að eitthvað betra kæmi upp á borðið....en nú 11 árum seinna hefur ekkert svosem betra rekið á fjörur maddömunnar!!! En maddömunni þykir alltaf vænt um þetta fyrsta bónorð sem að var einlægt og kom beint frá hjartanu, sem er að verða fátítt nú á dögum þegar allt er svo "ammerískt"!
Ekki fleira að sinni.....

Jóla hvað..........

Maddaman hefur eytt öllu bloggpúðri sínu í jólabréfsframleiðslu um helgina en nú er maddaman að sjá fyrir lokin á þeirri framleiðslu og verður að bíta í það súra epli að játa á sig stafabrengl í fyrstu framleiðslunni! Þar stendur gengin þar sem réttilega á að vera gengin!!! Þetta finnst madömunni leiðinlegt og til háborinnar skammar og vill hún biðja áskrifendur jólabréfsins hér með velvirðingar á þessu. Annnars færist baðkarið óðum nær Betlehem og maddaman á eftir að framkvæma ýmsa gjörninga. Eins og klára að versla jólagjafir. Maddaman veit ekki hvor að hún á að gefa Sumarhúsbóndanum Mp3 spilara í jólagjöf en það ku vera heitasta jólagjöfin í ár! Maddaman veit reyndar að skyrtan klikkar aldrei en það er eldgamalt trikk! Maddaman óskar sér sjálf að fá kærasta í jólagjöf, það er nefnilega ákveðin verk sem að maddaman hefur not fyrir þá tegund í. Mest Annars hófst próflesturinn formlega í gær hjá maddömunni! Vei fyrir því. Það er sennilega ávísun á að maddaman fari kannski að kíkja í vískípelann hvað úr hverju....!
Ekki meira að sinni.....

Úff púff...

Maddaman var í heimsókn í fyrirtækinu Widex sem að framleiðir heyrnartæki í dag! Þetta var griðarlega spennandi og ekki spillti fyrir að við vorum í fullu fæði hjá fyrirtækinu í allan dag og þá meina ég FULLU og vorum leystar út með gjöfum! Maddaman var hrifin af þessu fyrirtæki sem að er í einkaeign og byrjaði rekstur sinn í kjallara í Lyngby árið 1956. Núna er það með 16.000 fermetra húsnæði í Værløse, 1500 starfsmenn um allan heim, 500 bara þarna á svæðinu og selja heyrnartæki og slíkan búnað um allan heim! Fyrirtækið er með algjöran sjálfsþurftarbúskap, sækir nánast ekkert til annara heldur framleiða allt á staðnum. Það var góður andi þarna og gaman að fá að sjá "hið raunverulega líf" sem að maddaman saknar stundum þegar hún situr og stautar í námsbókum sínum! Maddaman fór með eimreiðinni því að þetta er dágóðan spöl frá borginni og eins og ávallt naut maddaman að fylgjast með mannlífinu og samtölum sem að fara fram bæði við besta vin nútímamannsins farsímann og samferðafólk!
Af því að maddaman drap á besta vin mannsins þá dettur henni til hugar hnyttin saga sem að maddaman er að hugsa um að láta vaða. Hér fyrr í haust einhverntímann var maddaman að góna á sjónvarpið og sér þá auglýstan þátt sem að heitir "Besti vinur mannnsins" og maddaman gömul sveitakonan, hugsar strax að hér sé komin þáttur um hunda og hugsaði sér gott til glóðarinnar að fræðast svolítið um hundategundir ) maddaman hefur sérstakt dálæti á fræðsluþáttum en lítið á hundum en hefur aldrei séð eins mikið af mismunandi gerðum af þessum ófétum síðan hún flutti til DK og veit ekki skil á nærri því öllum ).
Þátturinn átti að vera seinna um kveldið og spennt kveikir maddaman á viðtækinu og sér Homo Sapiens af hinni gerðini hlaupa yfir skjáinn kviknakinn....og hugsar maddaman að þetta hafi þó verið undarleg kynning á hundaprógramminu og eiginlega óviðeigandi. Svo súmmar blessaður tökumaðurinn inn á svona hárlausan hund einhvern, ótrúlega lítinn eitthvað og maddaman fer strax að hugsa um "handtöskuhundinn" sem að hún sá einu sinni í tösku í strætó nem hvað maddömuna minnti að hann væri loðinn og með slaufur. Nema hvað að maddaman skrúfar nú loksins upp í þulinum og áttar sig mjöööööög fljótlega á því að þetta prógramm er alls ekki um hunda heldur typpi! Maddaman var svo slegin að hún horfði á prógrammið til enda og er mun fróðari um þennan ágæta líkamspart sem að maddömuna skortir þó sannarlega!
Þar hafið þið það

Jamm og j

Maddaman ræddi við vinkonu sína gegnum sæstreng í kvöld...vinkonan var hress og afkomandinn einnig sem að spjallaði við maddömuna á frumsömdu tungumáli en kann þó grunnatriði eins og að jarma og gelta og svona helstu dýrahljóð. Maddaman var svo hjá drengjunum sínum í dag sem að voru ósköp stressaðir og trekktir. Maddaman reyndi þó að létta þeim lund með að pakka 1000 bréfum fyrir þá og frímerkja. Maddaman hélt nú í einfeldni sinni að það væri bara hægt að stimpla þessi óféti en Danska póstþjónustan er svo forn að það er ekki í boði nema fyrir morðfjár. Jamm og já
Sumarhúsabóndinn er víst búin að fá nýjan gemsa og eins og alþjóð veit er hann ekki sérstaklega tæknivæddur og stundum er hann eitthvað að kynna sér tæknibúnaðinn og hringir þá óvart í aðra fjölskyldumeðlimi. Um daginn var hann eitthvað að róta og hringdi í systur maddömunar. Varð aldeilis hissa þegar hann heyrði í henni en breytti þessu svo bara í spjall fyrst að hann var nú búin að ná í gegn. Svo spjalla maddömmusystirin og Sumarhúsabóndinn dágóða stund. Samtalið endaði svo eins fljótt og það hófst svo að ég noti orð sys "þá er bara eins og Sumarhúsabóndinn hafi verið skotinn, hvarf bara í miðri setningu" En maddaman veit að Sumarhúsabóndinn er í fullu fjöri!

Lengingar og styttingar

Maddaman vill láta lengja jólamánuðinn vegna anna.... maddaman veit um fleiri sem að vilja það og stytta svo janúar í staðinn, já taka bara svona hálfan janúar í jólafrí hvernig væri það!!!
Það er annasamt hjá maddömunni á öllum vígstöðvum bókstaflega en það er bara íslenska viðhorfið...þetta reddast!!!

Ormar í iðrum

Jæja maddaman hefur ekki látið til sín heyra:o) Af margvíslegum ástæðum, það var ormur í iðrum fartölvunnar og erfitt að ráða niðurlögum hans! En það tókst með góðra manna hjálp!
Maddaman brá sér á enn eitt jólahlaðborðið með mublufólkinu á laugardaginn gríðarlega góðan veitingastað. Síðan var dansað fram á rauða nótt við drengina og skrönglast heim undir morgun á pinnahælunum!
Sunnudagurinn var eilítið fótfúinn og rykugur en glaðnaði til þegar leið á daginn.
Allt í allt ágætis helgi

Heim í heiðardalinn......

Jæja maddaman bloggaði ekkert i gær því að í gærmorgun fór hún til Fredericia í verknám, sem að reyndar er meira áhorf en verknám! Gærdagurinn fór í að þræða sveitavegi á Fjóni til þess að skoða leikskólabörn þar.
Maddaman gisti svo í Skærby í nótt en það er pínulítill bæ fyrir utan Fredericia. Maddaman fékk flashback á Patró við veruna þarna sem að þó var ekki löng. Aðalgatan var eins og Aðalstrætið á Patró og endaði á höfn eins og þar. Þarna var lítil búð eins og Kjöt og Fiskur á Patró og verðlagið svipað. Lítil búlla við höfnina og enginn fótgangangandi. Maddaman gleymir nebbilega aldrei þegar hún þrammaði í fyrsta sinn eftir Aðalstrætinu á Patró og drekkhlaðinn fólksbíll stoppaði nánast til að berja maddömuna augum og hundurinn í bílnum var meira að segja öfugur af æsingi yfir þessari kvenpersónu!!
En maddaman spjallaði við lókalinn í Fredericia og hældi hafnarbænum i hástert sem að þeir byggðu virki utan um og gerðu allar götur þráðbeinar til þess að auðveldara væri að verjast Þjóðverjum! Hverjum öðrum! Var komin með heimboð hjá gömlu köllunum á stoppistöðinni og alveg inn í jólagjafainnkaupunum hjá þeim!
En eins og madddaman hefur gaman af öllu útstáelsi þá er ekkert betra en koma heim, alveg sama hvað ferðalagið hefur verið skemmtilegt.
Svoleiðis á það líka að vera.

Jólahvað....

Maddaman gefur hér með út opinbera tilkynningu! Maddaman er á leiðinni á klakann til þess að eyða jólunum með Sumarhúsabóndanum, konu hans og jöklinum. Maddaman getur ekki annað en puðrað þessum fréttum út yfir netverja af tómri tilhlökkun. Madamman hefur nebbilega ekki haldið síðustu tvenn jól á Ísalandinu og síðustu þrenn jól hefur hún ekki hitt jökulinn heldur! Smá tölfræði hérna. Maddaman þarf samt að vera iðin við kolann og hafa bækurnar með sér en hún hlakkar til að heyra friðsælt jórtrið í kindum Sumarhúsabóndans og að heyra konu hans skarka í eldhúsinu á morgnana og heyra jökulinn ræskja sig og hlæja dátt!
En þangað til vonar maddaman að það fari ekki fyrir henni eins og Skrámi okkar....50 mg af valíum og eina viskíflösku á dag fram að jólum( skítt með viskíð en maddaman er ekki fyrir pilluát ), því að það er ýmislegt sem maddaman þarf að framkvæma!!!!

Bragarbót....

Maddaman vill gera bragarbót.
Þegar hún var að telja upp búsetustaði sína þá gleymdist einn af aðalstöðunum
Flókagata 15: Maddaman hefur þó aldrei haft lögheimili sitt þar formlega en þar hefur maddaman getað komið jafnt á nóttu sem degi síðastliðin 7 ár. Innifalinn leigubílaakstur út fyrir borgarmörkin og hvaðeina. Í harðri samkeppni við Hreyfil. Alltaf gott að koma þar, er búin að prófa flest af herbergjunum sem ætluð eru til svefns!
Þakka ábendinguna frá glöggum lesanda.

Það er auðvelt að standa sig,
ef að maður vandar sig
frá upphafi í því,
sem er innan handar
að standa sig í.

Þessa limru sem að heitir Taó orti Þorsteinn Valdimarsson frændi minn. Mér þykir hún ákfalega góð og er reyndar hrifin af kveðskap hans það sem að ég hef lesið.

Þrjóskan góða

Maddaman frétti af ungum pilti sem er greindur á opinberum pappírum með þrjósku, maddaman vill meina að það hljóti að vera krónísk þrjóska. Nú er það ekki við hæfi að maddaman sé mikið að fetta fingur út í greiningar og syndrom hverskyns ( svona í ljósi þess að þessar greiningar veita maddömunni lifibrauð ) En maddaman heldur samt að það sé mikið af krónískt þrjósku fólki til, maddaman er allavega harðánægð með sitt þrjóskugen sem oft hefur komið sér vel í harðri lífsbaráttu maddömunnuar!
Dettur henni þá kannski fyrst til hugar þegar madömmubróðir drap niður fæti á Kastrupvelli forðum. Maddman mælti sér mót við bróður og beið spennt eftir að sjá ásjónu hans lýsa upp völlinn. Maddaman dokaði og dokaði og dokaði eins og maðurinn sagði forðum og sá hálfa íslensku þjóðina geisast út út vélinni en ekkert bólaði á bróður. Eftir klukkutíma var maddaman farin að ókyrrast og setti sig í samband við flugmálastjórn og hafði maðurinn í vélina farið. Maddaman bað þá flugvallarstarfsmenn um að athuga hvort að nokkuð væri verið að starfa við að leita innvortis í bróður sælum! Ekki voru starfsmenn tepptir við það en þessi elskulega kona spurði hvort að það gæti verið að hann væri að leita að pólítísku hæli, það var nefnilega einn strand í þeirri deild! Eftir að hafa þjarmað að flugvallastarfsmönnum dágóða stund var hann kallaður upp í hátalarakerfinu tvisvar. Ekkert gerðist. Það var að verða grámórautt sinnið í maddömunni og hugðist hún halda heim á leið. Kemur þá ekki bróðir fagnandi og bauð góðan daginn og spurði hvort maddaman væri löngu komin! Þá sat hann bara og skóflaði í sig nautasteik og öli og beið eftir að maddaman kæmi steðjandi upp í fríhöfnina að hitta hann. Jú hann hafði sossum heyrt að það væri verið að kalla á einhvern Stefánsson en honum og ferðafélaganum kom saman um að það gæti ekki verið að neinn vildi ná tali af honum í útlöndum! Maddaman gat ekki annað en glott í laumi og hann fékk syndaaflausn. Enda vanur því að millilenda bara á þessum velli!
Ekki meira á þessum drottins degi....

Maddömmudjamm

Madamman er að byrja júlefrokostvertíðina og byrjaði hana með stæl! Down town með stelpunum, ægilega fínt út að borða á Brasserie Chit Chat. Lifrakæfa, bambi og súkkulaðikaka sem var bara snilld! Síðan var farið á djammið með frændum vorum færeyingum. Það er búið að skoða alla góða árganga í íslenskum karlmönnum svo nú eru það bara Færeyingarnir eftir. Madamman var fyrir vonbrigðum, þarna voru litlir drengir með lopahúfur sem að náðu maddömunni rétt i mitti og helmingurinn af Færeyska flotanum í landlegu en doldið þreyttir svona!!! Skildu ekkert í uppruna mínum fyrst að ég var ekki frá "Fúglafirði, Klakksvík, Sudurey eller Tórshavn"!!! Já svo er nú það. Maddaman kom heim léttreykt einsog lærin frá SS og fannst gott að fyrirhitta flet sitt!

Lumbran....

Maddaman hefur verið með lumbru í dag og gamalt húsráð í sveit maddömunar og nærsveitum er að lúra úr sér lumbruna. Það hafði enga þýðingu hvort að lumbran var handleggsbrot, kvef eða aðrir kvillar. Bara að lúra þetta úr sér! Enda hefur maddaman gert það svo til vandræða horfir nánast og vaknaði fyrr en grannarnir voru farnir að tjúna upp teitið.
Meira síðar..

Maddaman var búin að blogga þessi lifandis býsn í gærkveldi en bar svo við að bara fyrirsögnin dúkkar upp! En maddaman gefst nú ekki upp þótt móti blási og prófar aftur. Það kætir maddömuna mikið þegar að sólin stingur fram kollinum þessa daga sem að birtutíminn er af skornum skammti! Þá sér maddaman reyndar hvað rúðurnar hjá henni eru óstjórnlega drullugar en það er mikið áhættuatriði að skafa skítinn af þeim og maddaman var einu sinni "næstumþvídottinútafsjöunduhæð" þegar hún flækti sinn foxy fót í internetsnúrunni! Þetta var meðan maddaman bjó í skápnum. Þetta varð til þess að maddaman fór að rifja upp alla þá staði sem að hún hefur búið á í gegnum tíðina!

Óðals Sumarhúsabóndans og konu hans: Maddaman flutti í sér herbergi þegar hun var 4 ára og lokaði á eftir sér! Á ennþá sérherbergi með styttum og fleira góssi!
Heimavistin Brúarási: Maddaman bjó þar alla vetur frá því að hún var 7 vetra til 15 vetra. Grenjaði mikið fyrsta veturinn af heimþrá- mest stallsystur sinni til samlætis en allt gekk vel eftir það. Prófaði öll herbergin þar
Miðgarður Alþýðuskólanum Eiðum. Maddaman var þar í 10 bekk og stalst aldrei yfir til strákanna þrátt fyrir að hana langaði mikið til þess!
Gljúfraborg, Breiðdal- Maddaman hafði sumardvöl þar og naut skjóls skólasystur sinnar og vinkonu. Vann í fiski á Breiðdalvík og vakti húsráðendur með slæmum draumförum sínum um nætur.
Selás 25 Egilsstöðum- maddaman bjó þar fyrsta veturinn i menntó. Þar fylgdust grannarnir grannt með öllum gestagangi og kostaði miklar yfirheyrslur ef ókunnugir bílar sáust þar um nætur!
Heimavist ME. þar bjó maddaman tvo vetur og skemmti sér konunglega. Prófaði allavega 3 herbergi til búsetu opinberlega.
Tjarnarlönd 22- Maddaman hafði sumarsetu þar við 2 mann hjá frænku sinni!
Verbúðin á Breiðdalsvík- Bjó með vinkonum sínum og einum róna þar sumarlangt. Gleymst hafði að þrífa eftir síðasta síldarævintýri og róninn enginn pempía svosem. Gríðarlega fjölskrúðugt dýralíf!
Tjarnarbraut - maddaman leigði við þriðja mann efri hæð af prentaranum sem að snappaði daginn sem að madaman fyllti tuginn og henti henni út "enda óþolandi umferð af strákastóði hérna alla daga og nætur". Maddaman náði fullum sáttum við prentarann og hélt sínum búskap áfram með strákastóðinu ótrauð.
Grunnskólinn Hallormsstað- maddman bjó á almenningsklósettum í kjallaranum þar sumarlangt þó var salernisnotkun í lágmarki þetta sumarið því að maddaman svaf undir sturtunum. Mikill og góður selskapur af kóngulóm það sumarið
Sólvallagatan í Vesturbænum- maddaman á heimavist eina ferðina enn við þriðja mann i herbergi. Sambúðin gekk upp og ofan. Annar herbergisfélaginn ólétt en mest geðstirð samt og hin geymdi pitsur og fleira góðgæti undir rúminu sínu dögum saman!
Sigtún - Patreksfjörður- maddaman bjó í endaíbúð í verkamannabústöðum. Þar reyndi maður að komast inn um svefnhergbergisgluggann og svalahurðina að næturlagi. Maddaman skaut á skyndifundi með sér og sloppnum undir sænginni! Hugrökk að vanda skipaði maddaman manninum á brott á kjarngóðri íslensku. Ekki dugði þetta eins og í Búkollu forðum. Maddaman staðráðin í að standa vörð um siðprýði sína hringdi þá á lögregluna sem bjó á næsta götuhorni. Þeir brugðust skjótt við og komu eftir klukkutíma!!! Þá var maðurinn löngu búin að gefast upp á þessu brölti! Enga samúð fékk maddaman út á þetta. Sumarhúsabóndinn bauðst til að lána byssu að nafninu 244 og vinkona maddömunar ráðlagði henni að miða límbyssunni á óboðna gesti, passa bara að láta snúruna ekki sjást!!!
Bartholinsgade-Kaupmannahöfn- maddaman bjó sumarlangt við annan mann Dana. Herbergi maddömunar var inn af herbergi Danans og hann var með nýja kærustu í gangi, langhlaupara ef að ég man rétt! Say no more
Kalveboden, Sydhavn - Versta hverfi sem að maddaman hefur búið í á ævinni. Bjó í herbergi sem áður höfðu búið 7 kettir í og doldið af kattarflóm sem að lögðust á sinnið á maddömunni! Þarna var rakinn slíkur að maddaman þurkaði rúmfötin á sjálfum sér eins og Fjalla-Bensi forðum!
Dalslandsgade, 8- A-711. Mikil var gleði maddömunar þegar hún fékk lyklana af skápnum góða. 2 árum og 10 mánuðum seinna færði hún sig í tvöfaldan skáp hinu megin við götunar sem að hún býr enn í!
Ekki meira að sinni

Flutningar og fleirra....

Maddaman gerði gríðar lukku í vinnunni í dag! Það var nefnilega svoleiðis að gamla hreindýrið bakaði víst alltaf á frídögunum sínum þannig að strákarnir átu sætar kökur allavega tvisvar í viku og við erum ekkert að tala um neitt nart hérna! Þeir sögðu mér frá því að þegar Arne Jacobsen átti 100 ára afmæli fengur þeir 100 linsur ( kann ekki að þýða það á ylhýra en það eru svona sætar kökur frá bakaranum ) í tilefni dagsins til að bjóða kúnnunum! En þeim datt nú ekki til hugar að fara að splæsa þessu á kúnnana..heldur stútuðu þeir 3 strákar, linsunum á þremur dögum!!! Reyndar viðurkenntu þeir að hafa verið búnir að fá nóg af linsum og hafa víst ekkert verið að sækjast eftir þeim síðan!!! En allavega þá baunuðu strákarnir því á maddömuna í síðustu viku að það hefði greinilega gleymst að láta í samninginn hennar að hún ætti að baka vikulega!!! Maddaman hló nú bara að þeim...en var svo velviljuð að henda i eina gulrótarköku handa þeim í gær! Þeir voru hálfgert að afsaka sig yfir hvað þeir átu mikið en maddaman kann svooo vel að meta þegar menn láta velþóknun sína í ljós á matargerð og sýna það svo í verki! Þeir hlakka óskaplega til að hafa maddömuna með sér á jólahlaðborðið og sögðu henni meðal annars í fréttum að Davíð hefði farið út næstum öllum fötunum í fyrra. Maddaman ætlar að vera með Guð á prívatlínu næstu tvær vikur og biðja hann um að koma kirfilega í veg fyrir að Davíð fari úr restinni í ár!!!! Ef að kennarar eiga rétt á áfallahjálp vegna launamála sinna þá telur maddaman sig vera í fullum rétt að fá áfallahjálp vegna þessa máls!
Ekki meira að sinni.....
Fleira ekki í fréttum.....

Maddaman tekur sér stundum hverfisþramm með stöllu sinni og tók hún eitt slíkt í gærkveldi. Var mikill reykjarilmur í lofti frá vinum vors og blóma í Kristjáníu, þegar kólnar í veðri kynda þeir kröftuglega kamínurnar, ekki er víst svo mikið hassið til að fíra upp í.
Þetta minnti maddömuna á lítið hesthús austur á Héraði á óðalsjörð Sumarhúsabóndans. Þar reykir kona Sumarhúsabóndans í laumi á jólaföstunni, þó ekki hass en hangikét. Maddaman hefur yfirleitt viðhaft mikil útispjót til að fá sendan krík yfir hafið til jólanna og tókst það í fyrra. Mikil var gleði maddömunnar þegar hún þefaði af heimareyktum skankanum sem Sumarhúsabóndinn hafði alið og breytt í két ásamt konu sinni! Maddaman ferðaðist með kríkinn í Metro og vakti mikinn áhuga hunda og róna þann daginn fyrir góðan ilm!
Maddaman man líka eftir stjörnubjörtum vetrarkvöldum þegar hún var stelpuhnyðra og skondraðist með Sumarhúsabóndanum að hára skepnunum. Meðan Sumarhúsbóndinn valdi hey eftir kúnstarinnar reglum allt eftir hvaða árgangur átti í hlut og gaf á garðana, fékk hnyðran að brynna eftir kúnstarinnar reglum og gefa svona minna þýðingarminni skepnum eins og hrútunum og sparispíssunum, stundum voru líka hænugrey sem að þurfti að traktera! Stundum fékk stelpuhnyðran að gefa sjálf á einn auðvelda garðann og þá þurfti að vanda til verka því að Sumarhúsabóndinn vildi ekki sjá að heyinu væri þyrlað um krærnar og hent um garðana. Sumarhúsabóndinn vildi að maður væri natin við skepnurnar og verk sín. Svo þurfti að troða moði eða heyi í poka handa hrossum Sumarhúsabóndans, það var erfitt að gera svo að Sumarhúsabóndanum líkaði vel og dró hann stelpu hnyðruna oft að landi svo að pokinn yrði steintroðinn. Svo þumlunguðust Sumarhúsabóndinn og stelpuhnyðran út með pokann, þá var að hespa húsin aftur og þá vissu hundarnir að komin var tími til að rölta til bæjar. Sumarhúsabóndinn með heypokann á bakinu sem að var helmingi stærri en stelpuhnyðran og hún með eggin í vösunum eða í húfu með heyhreiðri og ströng fyrimæli um að fara varlega með þau, þá var gott að stinga litlum lófa í heitan hramm Sumarhúsabóndans sem alltaf gat gefið sér tíma til að leiða stelpuhnyðruna þrátt fyrir að verkahringurinn væri stór.
Ekki meiri nostalgígja að sinni....

Einhyrningurinn.....

Stórvinkona maddömunar kallaði maddömuna Einhyrning fyrir skömmu síðar. Kom það til út af því að verið var að skiptast á skoðunum á málefnum og var Stórvinkonan hrifin af viðhorfum maddömunnar sem að henni þóttu fágæt og þar af leiðandi sæmdi hún maddömuna Einhyrningstitlinum sem að henni þykir ekki afleitur! Hins vegar veltir maddaman því fyrir sér hvort ekki væri jafnvel gott að vera marghyrningur en það gæfi þá væntanlega til kynna að persóna hefði vald á mörgum hliðum málefnis. Svona skoðanaskipti minna maddömuna alltaf á sýslumann nokkurn í Húnavatnssýslu sem að maddaman telur sig muna að hafi heitið Jón Ísberg. Hann sagði að það væru fjórar hliðar á öllum málum, þín hlið, mín hlið, hans hlið og rétt hlið og það var ekki þar með sagt að hún væri nein af fyrrnefndum!
Maddaman er annars að horfa með öðru auganu á Örnen sem að hún er ekkert alltof hrifin af (reyndar hefur maddaman smá svaghed fyrir aðalleikaranum :o) fyrstu þættirnar minntu hana á byrjunina á Njálu en þar var mannfall mikið í byrjun. Maddaman er líka dauðþreytt á þessari kynsveltu systur Hallgríms sem að myglaði í mörg ár í Vestmanneyjum við að sinna karlægri móður sinni og komst greinilega ekki einu sinni á Þjóðhátíð fyrir skassinu!
Ekki fleira spaklegt að sinni...

Maddaman getur nú ekki annað en tekið áskorun þegar tilefni bjóðast!
Maddaman hefur dvalið mikið hjá bláu bókinni um helgina og á sennilega eftir að gera meira af því! Á hverri önn eignast maddaman nýja bók sem að henni er illa við. Eins og maddaman er nú bókhneigð. Í fyrra var bókin rauð sem að maddömunni var illa við! Maddaman hittir finnska stöllu sína einu sinni í viku til að ráða ráðum sínum um bláu bókina en sú finnska sem að kemur frá Wasa íFinnlandi (sem að hrökkbrauðið góða dregur nafn sitt af) eyðir líka miklum tíma með bláu bókinni! Maddaman vonast til að hún hafi vingast við þá bláu, þegar sá drottins dagur rennur upp að hún þarf að svara fyrir sig út úr bláu bókinni! Tæknimenn maddömunar eru alltaf að kenna henni eitthvað nýtt og á föstudaginn lærði maddaman að sækja sér kvikmyndir á netinu. Í gær horfði maddaman á Hafið sér til skemmtunar sem að henni þótti gríðargóð mynd og vel gerð. Maddaman fann sig strax í myndinni og þótti persónur vel útfærðar og litríkar! Maddaman getur nú ekki annað en vorkennt Balta kallgreyinu að þurfa að punga út með 70 millur fyrir ónýtt frystihús á Neskaupstað af öllum stöðum liggur henni við að segja.
Hér hefur verið sýnishorn af snjó í dag...en ekkert fárviðri sei sei nei! Það minnir maddömuna á fyrsta veturinn sem að hún var hérna en þá kom mikið fárviðri í lok nóvember sem að danskurinn kallaði fellibyl! Sumarhúsabóndinn faðir maddömunar sem að kallar nú ekki allt ömmu sína þegar kemur að roki reyndi ítrekað að ná í maddömuna gegnum sæstreng en maddaman svaf frá sér allar símhringingar enda búin að láta hjólið inn og örugg með sig og sitt! Sumarhúsabóndinn náði þó sambandi og hughreysti maddaman hann með þvi að norður í Hlíð kallaði maður þetta strekking!!
Fleira var ekki í fréttum

Stuðningur og fleira.......

Maddaman hefur fengið fjölda stuðningsyfirlýsinga og heillaóskir með nýja bloggið. Maddömunni líður eins og hún hafi gert eitthvað merkilegt t.d. fengið gott kjör, tekið gott próf eða alið af sér afkvæmi, svo mikill er samhugurinn! En maddaman er hamingjusöm með það!
Maddaman vill að gefnu tilefni upplýsa mál málanna sem hefur legið þungt á velunnurum og aðdáendum maddömunnar...en það er hjúskaparstaða maddömunnar! Hún er óbreytt semsagt ekkert nýtt af maddömunni. Maddaman hefur áður lofað og lýst því yfir í votta viðurvist að það verður gefin út tilkynning þegar eitthvað gerist, á prime time á Rás2 milli veðurfregna og dánarfregna! En þá veit maddaman að eyru manna eru hvað sperrtust! Þetta "ástand" plagar ekki maddömunna ólíkt því sem margur heldur. Maddaman er hæst ánægð með snæða lakkrís í morgunmat ef að það hentar henni, vakna og sofna þegar henni sýnist og vaska upp þegar staðan er orðin svoleiðis að annaðhvort er að kaupa meira leirtau eða vaska upp! Maddaman hefur mikið velt því fyrir sér hvernig það má vera að þetta sé það helsta sem að fólk vanhagar um að vita þegar spurt er frétta af maddömunni. Maddaman ferðast og hittir fólk, stundar nám og vinnu, les sér til skemmtunar og er ekki ófróð kona um menn og málefni! En þrátt fyrir allt þetta þá brennur þessi spurning á vörum fólks! Ein góð vinkona maddömunar svarar þessu á snaggarlegan hátt og segir hátt og snjallt að hún hneigist ekki til karlmann. Slegið hefur óhugnalegri þögn á samkvæmi með þessum orðum og maddaman getur ekki neitað að hún gælir við hugmyndina að svara á þennan hátt!
En maddaman er auðvitað alltaf opin fyrir tillögum....ef einhver veit af kassavönum, lítið notuðum, drykkfelldum og söngelskum Íslending...þá er víst ekki búið að þrengja hringinn of mikið!
Svo mörg voru orð!

Framkvæmdagleði og fleira gott....

Dagar maddömunnar eru dimmir og langir um þessar mundir og augnlokin ákaflega síð á morgnana! Maddaman lumar þó á góðu húsráði frá menntaskólagöngu sinni við þessu en það er að lofa sér því hátíðlega að leggja sig um leið og maður hefur lausa stund til þess! Maddömunni þykir harla gott að falla fyrir þessu bragði hvern einasta morgun.....því af lagningunni verður aldrei neitt og munar maddömuna í gamla góða daga þegar þetta var iðkað reglulega.
Maddaman er manneskja framkvæmda eins og allir vita sem þekkja hana. Maddaman hitti fyrrum samstarfskonu sín í dag sem að rifjaði upp gamla góða daga þegar maddaman leysti af á skrifstofu stúdentagarðanna! Aðalstarf maddömunnar var að meta hvort að íbúar garðanna sýndu nægilega námsframvindu til að geta búið áfram á görðunum! Maddaman sendi svo viðkomandi bréf með viðeigandi innihaldi! Bréfin þau arna voru inn í tölvukerfi Dan- Ejendom sem að ræður yfir töluvert meira húsnæði. Samstarfskona maddömunnar er engin tölvumanneskja og setti hana lauslega inn í þetta kerfi, og skrifaði maddaman fjölda bréfa daginn þann! Þegar maddaman kom glöð og reif til vinnu sinnar morguninn eftir var uppi fótur og fit og samstarfskonan gráti næst. Forstjórinn og yfirdeildarstjóri fyrirtækisins voru lamaðir af skelfingu því að maddaman hafði gefið tölvukerfinu skipun um að segja upp öllum leigendum í ákveðnum götum!!!! Talvan var svo búin að dunda við að segja liðinu upp alla nóttina meðan maddaman svaf á sínu græna og "anede ikke uraad". Það voru u.þ.bþ 4500 manns sem að maddaman hafði sagt upp af einskærri atorkusemi og þetta gátu menn athugað í rafræna kerfinu sínu!! Fólk sem búið var að búa í 30 ár í sömu íbúðinni átti bara að pakka í hvelli og flytja! Maddaman var óneitanlega rjóð í kinnum fram eftir degi.....en nú 2 árum seinna þykir henni þetta bráðfyndið!
Maddaman hefur móttekið ýmsar ábendingar eftir að hún hóf netheimaskrifin og þar á meðal að eigi sé hægt að kommenta spekina. Maddaman mun setja tæknimenn sína í málið og leysa hið bráðasta. Anders har også klaget over at han ikke forstår hvad maddaman skriver...men Anders jeg har jo fortalt dig at du skal tage dig sammen og lære lidt islandsk!!!
Svo mörg voru þau orð!

Íslands forni fjandi....

Maddaman stundar vinnu sína grimmt á þriðjudögum. Þykir maddömunni gaman að sproka við karlkyns vinnufélaga sína en það er eina tegundin af Homo Sapiens sem er í boði á vinnustaðnum ásamt maddömunni! Þykir maddömunni þetta góð tilbreyting frá skólanum en þar er mikið um stjórnsamar kvensur og skörunglegar!
Maddaman les gjarnan Politiken í frúkostpásunni og í dag las hún um hvernig Baugsheimsveldið eru að kaupa upp sína fornu fjendur. Maddaman gat ekki annað en skotið á vinnufélagana og sagði þeim að nú væri verið að hefna fyrir maðkaða hveitið forðum og flest vígi væru fallin. Það væri bara drottningin eftir. Það vakti gríðarlega kátínu og yfirmaður maddömunnar sagði að Íslendingum væri guðvelkomið að fá hana með öllu tilheyrandi. En maddaman var snögg að afþakka þann bagga á þjóðina. Nóg er nú samt!
Svo mörg voru þau orð....

Maddaman hefur upp raust sína....

Þá er komið að frumraun maddömunnar í netheimum!
Hér verður leitast við að svara lífsgátunni með heimspekilegum tilgátum ásamt hæfilegum skammti af sproki í bland!