prufa

Blogg lífgunartilraun

Langt er nú liðið síðan síðast, en ég er að hugsa um að endurnýja bloggið í tilefni af því að eftir eina vinnuviku kemst ég í sumarfrí og eftir það tekur fæðingarorlof. Það eru 7 vikur í komu erfingans og ég er að hugsa um að nota síðuna hérna til að setja inn myndir þegar að því kemur og kannski skrifa einhverjar fréttir. Við viljum gjarnan geta aðgangsstýrt þessum upplýsingum;O) Annars ætlum við að bruna í sumarfrí til Svíaríkis um næstu helgi og vera allavega í 10 daga að skoða Stokkhóm, Smálöndin og Skán.
Over and out í bili

Uppdeit af fætinum

Fóturinn er búin að fara í einu lagi til nýja læknisins sem að úrskurði þetta vera tognað liðband og ávísaði þeirri gömlu gigtarkremi og ef að það dugar ekki þá á að sprauta í fótinn eftir hálfan mánuð!! Nú er bara að vona að kremið dugi. Það væri allavega ódýr lausn heilar 57 krónur reiddi ég fram fyrir það!!

Sumarið er tíminn....

Sumarið er komið til okkar hérna í Köben og veðrið búið að leika við okkur síðan um páska. Allt stefnir í að aprílmánuður verði sólríkasti mánuður hér síðan að mælingar hófust. Dúnúlpurnar á leið í geymsluna góðu og þá er hægt að lýsa yfir opinberu sumri. Sumarið hefur ekki verið planlagt í smáatriðum ennþá. Niels verður í skólanum út júnímánuð en þá fer hann í sumarfrí frá skólanum en þarf auðvitað að sinna ruslaskyldum sínum. Ég á hinsvegar heldur lítið sumarfrí vegna þess að ég byrjaði svo seint á árinu en á þó allavega eina viku og ætla svo að taka aðeins launalaust frí í júlímánuði. Í ágústmánuði er ég svo að hugsa um að bregða mér í fæðingarorlof en 14. september segja vísindin okkur hjónum að við megum búast við að verða erfingja auðið. Það er auðvitað mikil ánægja með það og það er gaman frá því að segja að honum virðist strax vera í móðurætt sína skotið (skv. föðurnum) og var ekkert nema þrjóskan þegar farið var í 20 vikna sónar. Blessuð konan sagði allavega þrisvar sinnum að þetta barn væri ekki mikið fyrir svona mælingar og myndatökur og sat uppi með alla fjölskylduna í lengri tíma og þegar hún svo ætlaði að taka mynd handa stoltum verðandi foreldrunum þá stakk blessað barnið sér á bólakaf og útkoman varð kolsvört mynd sem minnir helst á loftmyndir af tunglinu!!!!

Páskaskýrslan

Las um daginn í blöðunum að það væri ægilega gott að droppa við á fésbókinni eða álíka þá sneri maður svo endurnýjaður til vinnu aftur....þannig að ég er að stelast til að blogga í vinnunni!!!
Páskahátíðin fór nú aldeilis vel fram...við fengum Gunnu okkar heila á húfi með lestinni frá Osló á skírdagskvöldið með alla nýjustu frasana á því alþjóðlega máli Esperanto en hún hafði verið að míngla við Esperantomanninn í lestinni sem var á leið á Esperantoráðstefnu! Á föstudaginn langa tókum við smá túristahring gegnum Nýhöfnina til drottningarinnar enda við ekkert búin að heilsa upp á hana síðan við komum. Í bakaleiðinni settumst við á kaffihús niður í bæ og létum sólina baka okkur, enda hefur verið 15 stiga hiti hér alla páskana og við náðum meira segja aðeins að roðna í andlitinu. Á laugardaginn fórum við Gunna svo í pjötlubúðir með lélegum árangri sérstaklega þó hjá Gunnu!!! Á páskadag fórum við í Tívolí með eldri borgurum borgarinnar og litli drengurinn Niels fékk að leika sér í tækjunum meðan við Gunna sátum eins og gamlar leiðinlega frænkur (sem ekki fara í tækin í Tivolí!!!) á bekkjum víðs vegar að bíða eftir honum!!! Á annnan í páskum fóru Gunna og vonandi Esperantómaðurinn líka af stað til Noregs í hádeginu og við hjónin fórum í ævintýralega langan göngutúr í góða veðrinu og misstum áttir um tíma!!! Sá galli er á gjöf Njarðar að um leið og ég flutti aftur til Danmerkur tóku sig upp gamlir kvillar en bæði Neðra- Hné og snúni ökklinn hafa snúið aftur tvíefld....því að upphaflega uppskar ég þessa áverka í tvennu lagi. Ég hef því haltrað eins og áttræð í tvo mánuði og treysti mér oft ekki til að hlaupa stigana í vinnunni því miður. Við fóturinn erum því að hugsa um að leita í einu lagi til læknis á næstunni og vita hvort að okkur verður ekki ráðlagt eitthvað gott!!!!! Annars hlökkum við til sumarsins og að njóta veðurblíðunnar á ströndinni og víðar um bæinn.

blogg....

Er að stelast til að blogga í vinnunni, færði mig á nýjan stað í gær og sit núna við hliðina á yfirmanni mínum sem að mér finnst ekki alveg nógu góð staðsetning en hann er í gönguferð í Tíbet núna þannig að það er um að gera að reyna að blogga meðan hann er þar!!! Fékk í dag lagðar línurnar um hvað fyrsta verkefnið mitt verður þannig að nú fer eitthvað meira að gerast. Vorið er komið og það er spáð allt að 17 stiga hita á laugardaginn ef að það stenst. Ég er alveg eins og gamalmenni hlakka alveg óskaplega til þess að fá páskafrí til að slaka aðeins á, þetta er búið að vera ansi stíft prógramm síðan fyrir jólin í flutningum og byrja í nýrri vinnu/setjast á skólabekk. Gunna frænka ætlar að koma til okkar frá Osló um páskana og við hlökkum ógurlega til að fá hana að leika við;O)

Rapportið....

Jæja þá er ég búin að vera mánuð í vinnunni og líkar bara vel! Við erum smátt og smátt að klára að koma okkur fyrir og að verða búin að ganga frá praktískum málum! Talandi um að vera praktískur, á innra netinu í vinnunni koma alls kyns upplýsingar sem varðar starfsemina og meðal annars er hægt að láta ýmsar tilkynningar og þarna nota menn tækifærið og þakka ma. fyrir afmælisgjafir. Þar skrifaði Lars nokkur tilkynningu um daginn og þakkaði kærlega fyrir háþrýstidæluna sem hann fékk þegar hann varð sextugur núna í mars og hann hlakkar mikið til að fara að smúla húsið þegar hlýnar og hita svo te í nýja tekatlinum á eftir!!!! Ekki það að Lars hefur vafalítið látið uppi óskir um að fá umrædda dælu í afmælisgjöf og það er sjálfsagt að leitast við að uppfylla óskir mannana. Annars ætlum við hjónin að sækja Ali vin okkar heim annað kvöld en hann rekur frábæran veitingastað niður í bæ.
Pant annars ekki fá háþrýstidælu frá ykkur þegar ég verð sextug.......

Erótíska safnið

Jæja við fundum banka sem tók öllum okkar peningum fagnandi...og ætla að skaffa okkur kort og ýmis mannréttindi og voru ekki með neinar óþægilegar spurningar. Skatturinn ætlar svo gjarnan að taka við restinni sem bankinn hefur ekki pláss fyrir þannig að allt er þetta hið besta mál. Hérna gengur allt smurt þegar maður er kominn inn í kerfið!! Helstu ótíðindin í fjölmiðlum hérna er að Erótíska safnið hérna í Kaupmannahöfn er komið á hausinn og menn vonast eftir fjárframlögum til að halda því gangandi. Á topp 10 yfir peninga sem ég hef séð mest eftir að hafa eytt um ævina þá er nú aðgangur að erótíska safninu mjög ofarlega. Það var rándýrt inn á safnið og bókstaflega ekkert að sjá nema einhverjar fornaldarlegar dúkkur í vaðmáli í glerklefa að riðlast hægt á hvor annari til að sýna hvernig þjónusta í vændishúsum hefði verið á dögum Fjölnismanna!!! Síðan var úrval af heimagerðum getnaðarvörnum á borði og svo var hægt að horfa á erótískar myndir í hliðarsal!!! Nei þá bið ég nú heldur um Thorvaldsens museum sem er stórmerkilegt og mjög flott safn.
Over and out...

Bloggið gengið í endurnýjun lífdaga...

Jahérna nú er sjá hvort að ég sé búin að týna niður blogghæfninni;O) Litla fjölskyldan er flutt inn á Eyrarsundsgarðana í 44 fermetrana og er strax búin að fylla eina 6 fermetra geymslu af eigum sínum sem ekki komast fyrir. Annars komust húsgögnin nokkuð vel fyrir hérna, eiginlega bara sófaborðið sem við höfum ekki pláss fyrir. En það er nokkuð ljóst að stilla verður eignasöfnun í algert hóf meðan dvalist er hér. Íbúðin er fín og nýtist okkur mjög vel og við erum mjög ánægð. Mér líst bara vel á mig í vinnunni er nú ekkert farin að gera neitt að ráði er mest á kynningarfundum og að læra að rata um húsið og finna hvar maður sækir um að fá ruslafötu og svona ýmisleg mannréttindi!!! Þetta er mjög stór vinnustaður eða 650 manns og 2/3 karlmenn en ég er ekkert búin að nefna það við Niels!!!! Rúsínan í pylsuendanum er svo að ég er ekki nema 50 mínútur að komast í vinnuna og það er mjög þægileg ferð þannig að ég les bara í lestinni. Það gerir það að verkum að ég er vel á veg komin með sorgarferlið vegna litla Yaris sem flutti til Helga í Hafnarfirði!
Húsbóndinn er mjög ánægður í skólanum sínum og orðinn hópstjóri í hópnum sínum og finnst hann vera á réttri hillu í þessu námi. Nú ekki þýddi annað en reyna að láta hann afla sér einhverra vasapeninga og þess vegna er hann orðin ruslakarl eins og spúsan var forðum þannig að þetta er alger nostalgígja þetta stúdentagarðalíf. Annars eru helstu baráttumálin að reyna að fá að opna bankareikning hérna en orðstír íslendinga hefur greinilega farið víða og síðasti banki sem að við reyndum við eftir að hafa skilað inn öllu ómögulegum upplýsingum upp úr okkur kvað upp þann dóm að þeim finndist þeir ekki hafa næga yfirsýn yfir fjármál okkar!!!! Húsbóndinn reyndi að útskýra á einfaldan máta fyrir þessari ágætu konu að við ætluðum ekki að fá lánaða peninga heldur láta peningana inn í bankann. En allt kom fyrir ekki....framhald síðar af bankamálunum....