ammilis.....

Úff, púff...maddaman fagnaði því að vera árinu eldri á föstudagskvöldið og bauð til fagnaðar í partípleisinu! Það var kneyfað öl og ýmsilegt fleira á fljótandi formi. Júllinn kom sterkur inn með gítarinn og þetta var ógurlegt fjör, alllavega fannst maddömunni það! Það var soldil síldartunnustemming í kotinu en þröngt mega sáttir sitja. Fyrir þá vini maddömunnar sem að æddu til útlanda þessa helgi....þá var þetta tóm snilld og rætt var um það í partýinu hvort að menn yfir höfuð komist með á listann næst ef að menn eru í útlöndum á svona góðum dögum.
Nú síðan var haldið á Lúbarinn-síbarinn, allavega þeir hraustustu, hinir fóru heim undir alskyns yfirskini. Síðan var kíkt aftur hingað í eftirpart og um það bil sem að barbafjölskyldurnar voru að bresta á fætur á ganginum var maddaman að loka augunum. Maddaman fékk ægilegar fínar gjafir, rauðvín og gjafabréf og Kim Larsen disk sem að var ekker vinsæll í eftirpartýinu en maddömmunni finnst frábær!!!!
Uppdeit: Það er von á 8unda barninu á ganginum en maddaman sá það stinga sér út úr kápu móður sinnar í fyrradag.
Tips: Það er gott að drekka gin&tonic en varast ber að drekka það fram undir háttatíma!

Meme og hehe

Maddaman er búin að vera að skaka með tusku og ræstiduft í eldhúsinu í 5 klukkutíma og lítur það bara orðið ágætlega út! Það er allavega ekki verra en á pitsastaðnum á görðunum. Maddaman getur bara ekki lagt það á innviði sína að snæða þar nema að það standi til að laxera. Þeir eru frekar sveittir greyin og eins og ein vinkona mín lýsti svo snilldarlega "þá finnst henni ekki passa að klóra sér í pængnum og hnoða pitsur til skiptis"
Svo er einn af aðalgæjunum þarna alltaf ákaflega spældur við maddömuna síðan hún afþakkaði það gylliboð hans að fara með einum pitsavini hans heim!
En vinurinn spurði maddömuna ekki sjálfur heldur fékk sé umboðsmann til að spyrja og hafði að því töluverðan formála, vinurinn var ný fráskilinn og átti fína íbúð í einhverju gettóinu hérna og 3 krakkagrislinga, þetta var svona doldil fornaldarstemming yfir þessu öllu og hefði áhuginn verið yfir frostmarki fyrir þessa kynningarstarfsemi þá náði hann alkuli við þessar yfirlýsingar. Það er bara ekki á Sjálfstæðisbóndann leggjandi að fá Serba-Króata í fjölskylduna...nema náttúrulega hann gæti fengið að koma fé í hagagöngu í Svartfjallalandi!

Sambýlingar

Maddaman var spurð um daginn hvort að hún hefði verið í sambúð, hvursu maddaman neitaði. Maddaman fór þá að hugsa um að þetta væri kannski ekki alveg rétt hjá henni, því að maddaman hefur verið í sambúð....allavega í ein 14 ár!!! Því að hvað er sambúð annað en að búa með öðrum og þá varla endilega maka sínum. En maddaman mátti þrauka gegnum alla sína skólagöngu eilíflega í sambúð.
Meðan maddaman var barnung þá var búið á 4 manna herbergi stundum 5 manna. Síðustu árin í barnaskóla vorum við yfirleitt þrjár af því að þannig stóð á árgangnum. Svo kom 10. bekkur og Menntó og þá vorum við tvær til þrjár á herbergi. Þá er ótalin dvöl á verbúð þar sem að við vorum eimitt fimm í herbergi og hitt og annað tilfallandi. Það er ekki hægt að segja að prívatlífið hafi verið neitt ógurlega mikið eða næðið! Samt mesta furða að þetta hafi gengið nokkurn veginn árekstralaust að mestu. En tímarnirhafa breyst og nú er að ég held búið að leggja niður allflesta heimavistarskóla á landinu nema þar sem eru sérstakar landfræðilegar aðstæður og allavega eru yngri börn ekki geymd þar svo vikum skipti. Enda heldur maddaman að það mundi nú heldur betur verða uppi fótur og fit ef að ætti að fara senda 7 ára börn með íþróttatösku fulla af fötum í skólann til að vera þar frá mánudegi til föstudags. Maddaman varð að passa upp á dótið sitt sjálf, láta utan um rúmið sitt og koma með rúmfötin heim aðra hverja viku, passa að grauta ekki saman óhreinu fötunum og hreinu og passa að pakka niður dótinu sínu á föstudögum til þess að fara með heim í þvott. Eitt af fyrstu skiptunum sem að maddaman var í skólanum, þá gleymdi skólabílstjórinn henni í skólanum. Maddaman hafði farið að sækja töskuna sína og þegar hún kom aftur niður af heimavistinni þá var skólabílstjórinn lagður af stað án hennar.
Hamingjan sanna, það var stúrin 7 ára maddama sem að settist niður í stigann á heimavistinni og vissi ekki sitt rjúkandi ráð. Sem betur fer kom kennari maddömunnar og stórvinkona og bjargaði málunum með því að ræsa út menn á næstu bæjum sem að voru látnir hlaupa í veg fyrir skólabílinn og snúa honum við og sækja maddömuna! Þó þótti maddömunni verst að stórir strákar sem að voru í skólabílnum vissu vel að maddömuna vantaði í bílinn og þótti henni það alla tíð ótugtarlegt af þeim að segja ekki frá því að hana vantaði! En svona var lífið á heimavistinni, það var harður heimur ekki síður en nútíminn og ekki allir sem að kláruðu sig á þessu.
Maddömunni finnst ekki skrýtið að hún njóti þess í botn að búa ein og heldur að fjarbúðar formið myndi henta henni afskaplega vel......

Ahhhhhh

Ahhh maddaman hefur verið að sósalísera alla helgina, voðalega gott eitthvað. Fyrst að passa Tóka vin minn á Friggjardaginn svo allt sé í færeyskum stíl, hann kunni vel að meta íslensku útgáfuna af faðirvorinu og meistara Jakob sem er nú svona alþjóðlegur á Norðurlöndunum en gafst alveg upp á Bí bí og blaka og sneri sér með vanþóknun til veggjar!
Voðalega ljúft eitthvað....smurning kannski hvort að þarf að gera eitthvað við ruslahaugunum á heimilinu. Maddömuna dreymir um heimilishjálp eða uppþvottavél í 28 fermetrana........
Það er alltaf hægt að láta sig dreyma.....

Drullugir sokkar........

Maddaman var hrærð í kvöld yfir velvilja nágranna hennar sem kom og bankaði upp á hjá henni með drullusokk í hendi og bauðst til þess að hreinsa niðurfallið hjá henni! Fyrst að hann nú var byrjaður á annað borð þá fór hann bara til allra nágranna sinna! Maddaman þarf að launa honum greiðann við tækifæri!
Maddaman fór að finna drengina sína sem að höfðu saknað hennar mjög, miðað við fagnaðarlætin og meðal annars fylltu handtöskuna hennar af keðjum til "að nota um helgina" og þótti ekki leiðinlegt þegar kúnnarnir ráku upp stór augu meðan maddaman rjóð í vöngum dró þetta ásamt stórum hengilás upp úr dömulegri handtöskunni!

Bryllaup.....

Maddaman heyrði nýverið um fólk sem ætlar að giftast í komandi framtíð og er þar af leiðandi búið að senda út gullslegin boðskort til veislu, eins og siður er og er það vel.
Það sem maddömunni finnst hins vegar athyglisvert er það að í boðskortinu eru gjafir í formi eldhúsáhalda og matarstella afþakkaðar. Maddaman hugsaði strax, vá flott hjá þeim menn eiga allt nú á dögum og þetta er bara svona skynsamt fólk sem er búið að skrá sig úr lífsgæðakapphlaupinu!
En ekki aldeilis, næsta klausa var sú að komandi brúðhjón ætluðu í staðinn að fara í verulega veglega brúðkaupsferð út í heim og fjárframlög væru vel þegin! Einhvernveginn voru skilaboðin sú að menn ættu ekki að skera við neglur sér ef að brúðkaupsferðin ætti að vera eitthvað veglegri en miði til Grímseyjar aðra leiðina!
Maddaman hefur alltaf sagt að þegar hún gifti sig, ætli hún að reka úr túninu hjá Sumarhúsabóndanum og grilla það sem af túninu kemur ( enda bæði hentugt fyrir grænmetis og kjötætur) og slá svo upp harmónikuballi í hlöðunni og halda smá útihátíð, svo getur liðið gist í tjöldum á túninu og svo hafa menn bara með sér örlitla brjóstbirtu og þá verða allir svo dæmalaust ligeglad.
Þetta heldur maddaman að verði ljómandi gott og hún verður alsæl að fá miða til Grímseyjar í gjöf. Hins vegar er eftir að sjá hvernig mótleikarinn mun taka þessum plönum maddömunnar því að það er víst atriði að hafa einhvern til að giftast....En koma tímar, koma ráð!

þaðéldégnú

Maddaman er lítt gefin fyrir kaffi en kaffi með rommi er ekki svo afleitt á síðkvöldum, hefur maddaman nýlega uppgötvað eða er það kannski romm með kaffi allavega eru birgðir vínskápsins á þrotum...en hver gefur ekki tað í það!

Betri er barn en belgur.....

Eitthvað hefur nú fækkað í aðdáendaklúbb maddömunnar síðan hún var upp á sitt besta, en þakkar eftirtöldum 5 yfirlýstan stuðning!! Nú hljómar maddaman nákvæmlega eins og gamli íslenskukennarinn hennar á Eiðastað í gamla daga en hann tók alltaf 10 mínútur á hverjum morgni til þess að skamma okkur sem mætt vorum fyrir að hinir létu ekki sjá sig. Maddaman var ekki í þeim hópi sem að var fjarverandi, ó nei hún ásamt stallsystur sinni og etv. tveimur drengstaulum voru einu nemendurnir af 120 sem voru ekki með neina óheimila fjarveru allan þennan vetur og þótti gríðarlega nördalegt og hallærislegt.
Annars er snjór á pönnukökulandi og blessuð börnin öskra á ganginum eins og stungnir grísir.
Ef að þið sjáið í fréttum að annars sallarólegur íslenskur námsmaður af gerðinni kvenfólk hafi gengið berserskgang á íbúðargangi á Eyrnarsundsgarðinum þá er það pottþétt maddaman. Annars rennur maddömunni yfirleitt reiðin um leið og hún mætir þessum skinnum, því að þau fagna henni öll með tölu og Hákon litli lærði að segja nafn maddömunnar áður en hann yfir höfuð fór að tala nokkuð af viti. Benjamín 5 ára nágranni madömunnar, þreifaði líka hraustlega á kvið hennar um daginn til að tékka hvort að þar leyndist kannski barnungi en móðir hans er með 7 barn gangsins innanborðs. Maddaman fullvissaði Benjamín um að þetta væri bara grautur þarna inni fyrir og fannst honum það lítið spennandi. Maddaman hefur hins vegar engin plön um að bæta við 8unda hljóðabelgnum hér á ganginn! Enda mættu þau öskra hér alla daga ef að maddaman þyrfti ekki að hugsa akademískar hugsanir stundum!

Bloggedíbloggedíblogg....

Maddaman veit ekki hvort að hún ætlar að blogga meira. Maddaman getur ekki gert það upp við sig hvort að það á við hana að blogga. Maddaman setti sér líkar ákveðnar bloggreglur í upphafi og hefur reyndar staðið við þær þrátt fyrir að hana hafi langað hroðalega að brjóta eina þeirra einu sinni, þá stóðst hún freistinguna! Maddaman hefur heldur ekki komið sér upp því handsnúna tækniafreki sem að heitir teljari og er því lítt kunnug umferðinni á þessari síðu sinni! Umferðin hefur svo sem heldur enga þýðingu fyrir hvurt verður bloggað eður ei!
Maddaman getur heldur ekki alveg skilgreint afhverju hún ætti ekki að blogga, er kannski mest hrædd um að bloggið verði notað gegn henni! Til dæmis að einhver brjótist inn í íbúð maddömunnar meðan hún verður á U2 tónleikunum og og steli því dýrmætasta sem að hún á, blessaðri fartölvunni sem að fær ekki að fara með á tónleikana samkvæmt reglum og heldur ekki myndavélin og maddaman fær ekki einu sinni að taka flugelda með sér á tónleikana!
Hvaða bömmer, maddaman hafði hugsað sér að skjóta upp einni Hallgerði langbrókarbombu svona til að minna á víkingaþjóðina!!! Maddaman veit að hún er bara úr sveit.......en hvaða lið er með flugelda með sér í farteskinu í júlímánuði og yfir höfuð hreint bara ótrúlegt að það þurfi að hafa þetta í leiðbeiningum á miðanum!
En maddaman reynir að sofa á þessu með bloggið og meta það og vega.

U2

Maddaman er komin með U2 miðann í lúkurnar.......veit bara ekki alveg hvar á að geyma hann fram að stundinni miklu! Hæ hó og jibbí jei

Vegna áskorunar.....

Maddaman verður að taka áskorun og blogga aðeins fyrir Rögnuna og byrjar á því að hrósa happi að það er mjööög erfitt að fá innflutt gæludýr til DK og Interflora er vonandi ekki með neitt nema blaðlýs í sölu svo reyndu bara!!
Helst ber það til tíðinda að maddaman er búin að hitta alvörulækni sem flissaði bara að skýrslunni sem að dýralæknirinn nestaði maddömunna með! Lýsti því svo yfir að það væri mjög sjaldgæft að bein tækju upp á því að flytja búferlum á milli líkamsparta! Skoðaði þetta svo sjálfur og sagði maddömunni að þetta væri hnútur á sininni sem er í fætinum, þessi sem að strekkist á þegar tærnar eru beygðar og sagði henni að þetta væri bráðættgengt! Sumarhúsabóndinn er með svona hnúta í höndunum ( maddaman reyndar líka bara litla..... ) og hefur verið skorinn einu sinni upp við þessu en þetta kemur alltaf aftur. Það er hins vegar ekki skorið upp við þessu í fótum!
Maddaman og alvörulæknirinn ætla að deita aftur fljótt en fyrst á maddaman að fara í meiri myndatökur og skoða hvað ófétið er stórt!
Í annan stað ber það helst til tíðinda að maddaman reif sig á smalamennskutíma til að fara að kaupa U2 miða. Það kostaði heilan vinnudag í röð og síðasta miðann sem seldur var í Fona í Amagarcentrinu en prentarinn þar klikkaði og var ekki hægt að prenta miðann út og var maddömunni lofað öllu fögru um að fá miðann sendan í pósti!
Síðan ber það til tíðinda að síminn hringir og maddömunni er tjáð að það sé búið að selja þennan miða öðrum og prenta út hana viðkomandi og maddaman geti bara sótt aurana sína og farið heim og hlustað á gamlan U2 disk og bara klórað sér á meðan!
Maddaman undi því ekki vel og barðist hetjulegri baráttu til þess að ná í þessa glæpamenn sem að stóðu fyrir miðasölunni. Á endanum tókst það og þegar búið var að smjúga fram hjá símastúlkunni sem sannarlega áttaði sig á því að hún myndi ekki losna við þessa víkingakonu af línunni, þá var gefið samband við yfirmann. Eftir að Axel yfirmaður og maddaman höfðu átt góðar og hnitmiðaðar viðræður, þá dró Axel yfirmaður VIP sætamiða upp úr hattinum handa maddömunni og hlakkar til að sjá hana á U2 tónleikum!!!
Já Gunnhildargerðis og Hrjótarþrjóskan samankomnar í genasplæsingu borgar sig svo sannarlega!
Maddaman veit hvar hún verður 31. júlí....ef að miðinn kemur með póstinum!

Þorrablót......

Jæja maddaman búin að blóta þorrann ásamt 700 öðrum ofurölva íslendingum í Kaupmannahöfn, með öllu þessu klassíska sem að fylgir samkomuhaldi íslendinga!
En þetta var hin besta skemmtun og dansaði maddaman drjúgt, hljómsveitin frábær og maturinn eins og alltaf lítið súr en ágætur samt!
Maddömunni finnst samt giftu konurnar nískar á að lána mennina sína öðrum ógiftum konum til afnota að dansa við þá!!! Menn eiga alltaf að deila með sér!!!!
Maddaman vill þó þakka manninum með slitnu hásinina fyrir hetjulega frammistöðu í dansinum en hann gat ekki tekið neinar sveiflur bara beint áfram takk!!
En tærnar eru að jafna sig og allt að fara á betri veg!

Gæludýr.....

Maddaman er miklu hressari til sálar og líkama í dag. Sá kjól búin til úr súkkulaði í sjónvarpsfréttunum sem að örmjó sýningarstúlka rölti um í og át svo af súkkulaðiðikjólnum annað slagið. Maddaman heldur að þetta hafi verið á súkkulaðihátíð í Vín! Maddömuna langar í soleiðis kjól fyrir þorablótið en heldur samt að trylltur lýðurinn gæti ekki stillt sig um að éta helv.... kjólinn og þá væri nú maddaman í vondum málum!!!!
Annars er maddaman ekki að skilja fólk sem er með minningarsíður á netinu um hunda og ketti og er að maddömunni skilst í veikindafríi í vinnunni útaf andláti kalkaðra, geðstirðra hunda og katta! Maddaman er náttúrulega bara kaldrifjað sveitabarn sem að hefur mátt sjá af öllum sínum skepnum annaðhvort í pottinn, sláturhúsið eða gröfina. Á Héraði setja menn metnað sinn að skjóta sína hunda og hesta sjálfir sem þökk fyrir samfylgdina. Sumarhúsabóndinn útskýrði þennan gang lífsins fyrir maddömunni þegar hún var 5 ára og vildi láta 3 hrúta sem höfðu verið heimalingar um sumarið alla lifa. Sumarhúsabóndinn fór í gegnum það með maddömunni hverslags þrengsli það yrðu á búgarðinum og í heiminum öllum ef að allt sem fæddist fengi að lifa þar, plús afkomuþátt heimsbyggðarinnar. Og eftir smá þóf við Sumarhúsabóndann ákvað maddaman þegar hún var 5 ára að svona væri bara lífið og þau feðginin kvittuðu fyrir þetta með bláum Ópal með ammoníaki í sem að var ævinlega þrautaráð til að sætta maddömuna!
Maddaman skilur ekki svona gæludýrahald, bara botnar ekki í því hvernig menn nenna að eiga ketti sem að skíta á skottið á sér lon og don, páfagauka með æxli sem að þurfa í flóknar aðgerðir á dýraspítölum og gullfiska sem halda markaðnum gangandi með að éta hvern annan, hunda sem að sofa upp í og þarf að tannbursta og passa upp á getnaðarvarnir þeirra og þurfa að eiga vegabréf til að ferðast um heiminn!!!!
Maddaman ekki gæludýraunnandi.....